Read Kernewek Furneth 14 Bible Online

Furneth 14 - Kernewek bible

Furneth 14

¹Arta, den ow pareusi dhe vora ha vyajya dres tonnow garow a elow war damm a brenn moy hedorr ages an lester a'n deg.

²Rag yth o desir a wayn a dhevisyas an lester na, ha furneth o an krefter a'n drehevis;

³mes yth yw dha ragbreder, A Das, a lew y hyns, drefenn ty dhe ri dhodho hyns y'n mor, ha fordh saw y'n tonnow,

⁴ow tiskwedhes y hyllydh sawya dhiworth pub peryll, may hyll hwath den heb sleyghneth mora.

⁵Yth yw dha vodh na via oberow dha furneth koeg; rakhenna tus a worr aga bewnans yn charj dhe'n lyha tamm a brenn, hag ow tremena der an tonnow war skath-kloes sawys yns.

⁶Rag y'n dalleth ynwedh, pan esa kewri valgh ow mos dhe goll, govenek an bys a hwilas skovva yn skath-kloes, ha gidys dre dha leuv i a asas dhe'n bys has henedh nowydh.

⁷Rag bennigys yw an prenn may teu gwiryonedh dresto.

⁸Mes idol gwrys gans diwla yw mollethys, hag ynwedh ev neb a'n gwrug, ev, drefenn ev dh'y wul, ha'n pyth podradow drefenn y vos henwys duw.

⁹Rag kasadow dhe Dhuw yw an den didhuw ha'y weythres didhuw, an eyl kepar ha'y gila;

¹⁰rag an pyth a veu gwrys a vydh kessydhys war-barth gans an gwrier.

¹¹Ytho y fydh kessydhyans ynwedh war idolys an kenedhlow, rag kyn fons rann a'n pyth a veu gwrys gans Duw, i a dheuth ha bos tra gasadow, antylli rag enevow tus ha maglenn rag treys an re foll.

¹²Rag an tybyans a wruthyl idolys o an dalleth a fornikashyon, ha dismygyans anedha o legras bewnans;

¹³rag naneyl nyns ens dhiworth an dalleth, na nevra ny vydhons bys vykken.

¹⁴Rag dre woeth tus i a entras y'n bys, ha rakhenna diwedh kott re beu devisys ragdha.

¹⁵Rag tas, owth omwetha gans galar orth koll flogh dineythys a-varr, a wrug imaj a'y flogh re bia distowgh kemmerys dhe-ves; lemmyn ev a enoras avel duw an pyth o kyns den marow, ha delivra dh'y goskordh devosow kevrinek hag urdhyansow.

¹⁶Ena an devos didhuw, tevys krev dres termyn, o gwithys avel lagha, ha der arghadow myghternedh imajys gravys o gordhys.

¹⁷Pan na ylli tus enora myghternedh yn aga lok, drefenn i dhe driga a-bell, i a dhismygis aga semlans a-bellder, hag i a wrug imaj gweladow a'n myghtern a enorens, may hyllens der aga diwysykter fekla ev o pell dhe-ves kepar dell ve yn aga lok.

¹⁸Ena an kryjans ma a dheuth ha bos kreffa hwath yn mysk an re na aswonnis an myghtern, kennerthys gans gorvynn an krefter.

¹⁹Rag ev, martesen ow mynnes plesya y rewler, a ynnia an hevelep dre sleyghneth dhe gemmeres furv dekka,

²⁰ha'n routh, tennys dre dekter y ober, lemmyn a gemmeri avel neppyth dhe vos gordhys ev neb a veu kyns enorys avel den.

²¹Ha hemma a dheuth ha bos maglenn gudhys rag bewnans mab-den, rag tus, yn kethneth dhe anfeus po dhe awtorita ryel, a askrifa dhe daklennow a ven po prenn an hanow na dalvia bos kevrennys.

²²Ytho nyns o hemma lowr ragdha, i dhe errya a-dro dhe wodhvos Duw, mes kynth esens ow pywa yn strif meur dre reson diskians, an drogow bras ma i a elwis kres.

²³Rag mar latthens fleghes yn aga urdhyansow, po solempnya devosow kevrinek, po gul goelyow gwyls gans devosow astranj,

²⁴ny withens pur na fella aga bewnans na aga demmedhyansow, mes i a ladh an eyl y gila yn traytus, po grevya an eyl y gila der avoutri.

²⁵Pup-tra yma ladhva woesek, ladrynsi ha toell, legras, trayson, tervans, gowli,

²⁶ankresyans a dus dha, ankov a jerita, defolans enevow, kammdreylyans usadow reydhel, deray yn demmedhyansow, avoutri, ha harlotri diveth.

²⁷Rag gordhyans idolys na goedh aga henwel yw dalleth ha kaws ha diwedh pub drog.

²⁸Rag an re a's gordh, a vuskeg yn heudhder, po dargana gowyow, po bewa yn anewn, po gowlia heb hokyans;

²⁹drefenn i dhe drestya yn idolys heb bewnans i a de tiow drog ha ny waytyons godhevel pystik.

³⁰Mes y teu warnedha dew kessydhyans ewn: drefenn i dhe gammdybi a-dro dhe Dhuw ow kul lel wonis dhe idolys, hag ynwedh drefenn yn toell i dhe di yn anwiryon ow tispresya sansoleth.

³¹Rag nyns yw nerth an taklow dresta may te tus, mes an kessydhyans ewn rag an re a begh, hag a gessydh pup-prys treuspassow an re anewn.