Read Kernewek Furneth 15 Bible Online

Furneth 15 - Kernewek bible

Furneth 15

¹Mes ty, agan Duw, yw kuv ha gwiryon, lent ow serri, ow rewlya pup-tra yn tregeredh.

²Rag mar peghyn, dhiso jy yth eson, ha ni a aswonn dha alloes; mes ny beghyn, drefenn ni dhe wodhvos agan bos reknys dhe vos dhis.

³Rag aswonnvos ahanas yw ewnder dien, ha godhvos a'th halloes yw gwreydhenn anvarwoleth.

⁴Rag naneyl ny wrug tebel dhismygyans tus agan toella, na lavur difrut an payntyer, furv payntys gans liwyow divers,

⁵a's teves semlans hag a wra fellyon dhe yeuni war hy lergh, may hwansons furv dhianall imaj marow.

⁶Tus a gar taklow drog, ha na dhervynnons govenek gwell, yw an re a's gwra po aga desirya po aga gordhya.

⁷Priweythor a does an pri medhel hag yn lavurus shapya pub lester rag agan servis, ow kul yn-mes a'n keth pri an lestri a serv usyansow glan ha'n re rag usyansow kontrari, an eyl avel y gila; mes pandr'a vydh devnydh an eyl po y gila an priweythor y honan a ervir.

⁸Gans lavur diles, ev a furv duw koeg dhiworth an keth pri, an den ma neb a veu gwrys a bri a verr spys kyns, ha wosa termyn berr ev a dhehwel dhe'n dor may feu kemmerys dhiworto, pan dheu an termyn dhe dhaskorr an enev a veu prestys dhodho.

⁹Nyns yw a vern dhodho y vos destnys dhe verwel, po bos y vewnans berr, mes ev a gesstriv gans seri owr hag arghans, hag assaya gul kepar ha gweythoryon brons; hag ev a syns y teu glori dhodho, rag ev dhe wul gwara fug.

¹⁰Lusu yw y golonn, y wovenek yw moy distyr ages dor, ha'y vewnans yw moy disenorys ages pri,

¹¹drefenn ev dhe fyllel aswonn neb a'n furvyas ha'y lenwel a enev bew hag anella spyrys bew a-ji dhodho.

¹²Mes ev a reknas agan bewnans dhe vos gwari, ha bewnans dhe vos dy'goel synsys rag gwayn, rag yn-medh ev, ‘Res yw den dhe gavoes pygans yn py fordh bynag may haller, kyn fo dre vaynys drog.’

¹³Rag an den ma, moy ages oll an re erell, a woer ev dhe begha pan wra dhiworth devnydh a bri lestri brottel hag imajys gravys.

¹⁴Mes an moyha foll, ha moy truan ages baban, yw oll an eskerens a arwaskas dha bobel.

¹⁵Rag i a dybis oll idolys an kenedhlow dhe vos duwow, kyn na's teves naneyl devnydh aga lagasow dhe weles gansa, na frigow dhe denna anall, na skovornow rag klewes, na bysies diwla dhe handla, ha diles yw aga threys rag kerdhes.

¹⁶Rag den a's gwrug, ha nebonan mayth yw y spyrys kevys yn kendon a's furvyas; rag ny yll denvyth furvya duw haval dhodho y honan.

¹⁷Marwel yw ev, ha'n pyth a wra gans diwla dilagha yw marow; rag ev yw gwell ages an pythow a wordh, a-ban ev a'n jeves bewnans, mes i ny vewsons bythkweth.

¹⁸Ynwedh, i a wordhyas bestes an moyha kasadow, yw gweth ages oll an re erell pan yns breusys gans fowt aga skians;

¹⁹ha hwath avel enyvales nyns yns mar deg yn semlans may fons desirys, mes i a fyllis kavoes kommendyans Duw ha'y vennath.