Read Kernewek Furneth 16 Bible Online

Furneth 16 - Kernewek bible

Furneth 16

¹Rakhenna i a veu kessydhys dell dhegoedhas dre greaturs a'n par na, ha tormentys dre routh a vestes.

²Yn le kessydhyans ty a dhiskwedhas kuvder dhe'th pobel, ha ty a bareusis rynki dhe dhybri neppyth gans blas ankoth, boes ankoth dhe walgha aga ewl;

³may kollens, pan dhesirsons boes, an lyha remenant a ewl boes dre reson an hager greaturs dannvenys dhedha, ha may hwrellens dha bobel, wosa i dhe berthi esow termyn berr, dybri a'n boes ankoth.

⁴Rag res o esow anwoheladow dhe dhos war an arwaskoryon na, ha may fo diskwedhes dhe'th pobel fatell esa aga eskerens ow pos tormentys.

⁵Rag pan dheuth war dha bobel konnar euthyk kreaturs gwyls hag yth esons ow pos distruys dre vrathow serf kamm, ny wrug dha sorr pesya bys y'n diwedh;

⁶i a veu troblys pols avel gwarnyans, hag i a dhegemmeras arwoedh a dhelivrans dh'aga hovhe a worhemmynn dha lagha.

⁷Rag ev neb a dreylyas dhe'n arwoedh ny veu sawys der an pyth a welas, mes dredhos jy, Selwador peub.

⁸Ha dre hemma ynwedh ty a wrug dh'agan eskerens aswonn dha vos Selwador dhiworth pub drog.

⁹Mes an re erell a veu ledhys gans brathow lokustes ha kelyon, ha ny veu kevys ragdha eli vyth, rag i dhervynnas bos kessydhys dre daklow a'n par na.

¹⁰Mes nyns o dha vebyon fethys hwath dre dhyns serf gwenonek, rag dha dregeredh a dheuth dh'aga gweres ha'ga yaghhe.

¹¹I a veu brethys may kovhasens dha eryow, hag ena i a veu delivrys skon, ma na goedhsens yn ankov down ha dos ha bos dialloes dhe aswonn dha guvder.

¹²Rag ny wrug naneyl losow na powltis aga yaghhe, mes yth o dha er, A Arloedh, hag a yaghha peub.

¹³Rag ty a' fydh galloes war vewnans ha mernans; ty a led tus yn-nans bys yetys ifarn ha'ga dri yn-bann arta.

¹⁴Den yn y dhrogedh a ladh den arall, mes ny yll dri arta an spyrys diberthys, na rydhhe an enev prisonys.

¹⁵Mes nyns yw possybyl diank a'th torn;

¹⁶rag an re dhidhuw, ow skonya dha aswonn, a veu skorjys dre nerth dha vregh, helghys gans glawyow ankoth ha hager-awelyow dibita, ha konsumys glan gans tan.

¹⁷Rag, tra a'n moyha marthys, y'n dowr, hag a dhifeudh pup-tra, yth esa an tan ow kressya moy ha moy; rag an bys a omladh rag an re wiryon.

¹⁸Treweythyow an flamm a veu lettys, ma na allsa kowlleski an kreaturs a veu dannvenys erbynn an re dhidhuw; mes dre wel hemma mayth aswonnsens aga bos helghys dre vreus Duw;

¹⁹ha termyn arall hwath yn kres dowr, an flammow a loskas gans nerth moy fers ages tan, dhe dhifeythya askorr tir an re anwiryon.

²⁰Yn le an taklow ma ty a ros dhe'th pobel boes a eledh, ha heb aga lavur ty a dhannvonas dhedha dhiworth nev bara parys dhe dhybri, ow provia pub plesour, hag owth akordya gans an blas a veu gwell gans kettep onan.

²¹Rag dha sosten a dhiskleryas dha hwekter troha'th fleghes; ha'n bara, ow servya rag ewl kettep onan a'n kemmeri, y feu treylys dhe'n pyth o gwell ganso.

²²Ergh ha rew a borthas tan heb teudhi, mayth aswonnens bos trevasow aga eskerens difeythys gans an tan hag a dhewis y'n keser ha lughesi y'n kowasow;

²³mes an tan, rag may halla an re wiryon bos megys, a ankovas y nerth y honan hogen.

²⁴Rag kreashyon, orth dha servya jy, neb a'n gwrug, a striv dhe gessydhya an re anwiryon, hag a lows y nerth rag les an re a drest ynnos.

²⁵Rakhenna y'n eur na ynwedh, treylys yn pub furv, ev a servyas dha helder hag a vag pup-tra, war-lergh desir an re a bys warnas,

²⁶may tyska dha fleghes, a gerydh, A Arloedh, nag yw tevyans trevasow hag a vag mab-den mes yth yw dha er a sosten an re a drest ynnos.

²⁷Rag an pyth nag o distruys gans tan, pan veu toemmhes gans dewynnow berr an howl, a deudhis skon dhe-ves,

²⁸may fia godhvedhys y tegoedh dhyn sevel kyns an howl dhe bysi warnas, ha bos res dhyn pysi warnas yn bora an jydh;

²⁹rag govenek den nag yw grasek a deudh kepar ha rew gwav, ha frosa dhe-ves avel dowr skoellys.