Read Kernewek Furneth 17 Bible Online

Furneth 17 - Kernewek bible

Furneth 17

¹Meur yw dha vreusow ha kales dhe styrya; rakhenna enevow nag yw dyskys gallas yn sowdhan.

²Rag pan dybis an re dhilagha i dhe synsi an genedhel sans yn aga galloes, i aga honan a wrowedhas avel prisnoryon tewlder hag yn kargharow nos dhidhiwedh, degys a-ji yn-dann aga tho, divresow dhiworth an ragbreder bythkwethek.

³Rag yn aga feghosow kevrinek i a dybi na yllens bos gwelys a-dryv kroglenn dewl a ankov, mes i a veu skattrys, euthyk aga own, ha troblys gans tarosvannow.

⁴Hwath ny allas an sorn kudh a's synsis aga gwitha rag own, mes trosow euthyk a sonas a-dro dhedha, ha tarosvannow trist gans fasow tewl a omdhiskwedhas dhedha.

⁵Ny ylli nerth tan ri golow dhedha, na ny ylli flammow splann an ster dri golow dhe'n nos kasadow na.

⁶Nyns esa travyth ow splanna warnedha marnas tan euthyk hag a dhewis y honan, hag yn euth bras i a dybi an pythow a welsons dhe vos gweth ages an welesigeth na ma na yllsons mires orti.

⁷Kastys aga artow hudel o euver, ha'ga furneth vostys a veu keredhys gans skorn.

⁸Rag an re a ambosas chasya dhe-ves an browaghow ha'n troblow a enev klav o klav aga honan gans own hwarthus.

⁹Rag kyn nag esa travyth euthyk orth aga ownekhe, hwath, ow perthi euth a'n bestes gwyls a dremena dresta ha siow serf,

¹⁰i eth dhe goll ow krena yn euth, ow skonya a vires orth an ayr hogen, kyn na ylli bos gohelys yn tyller vyth.

¹¹Rag sherewynsi yw pyth ownek, dampnys der y dhustuni y honan; reudhys dre gowses, pup-prys ev re gorlewyas an kaletteryow.

¹²Rag nyns yw own travyth marnas hepkorr an gweres a dheu dhiworth reson;

¹³ha govenek, fethys der an gwannder ma ynno y honan, a reken diskians moy ages an kaws hag a dhre an torment.

¹⁴Mes der an nos, hag o yn hwir dialloes, hag a dheuth warnedha dhiworth downderyow ifarn, i oll a goskas an keth kosk,

¹⁵ha treweythyow i a veu chasys gans hager darosvannow, ha treweythyow i a veu palsyes dre drayturi aga enev aga honan; rag own desempis hag anwaytys a dheuth warnedha.

¹⁶Yndella piwpynag esa ena a goedhas dhe'n dor, hag a veu degeys yn prison nag o gwrys a horn;

¹⁷rag mar pe tiek po bugel deves po gonisyas ow lavurya y'n gwylvos, ev a veu dalghennys, hag a borthas tenkys anwoheladow; rag gans unn chayn a dewlder i oll a veu kelmys.

¹⁸Mar teffa gwyns ow hwibana, po son hweg a ydhyn yn mysk skorrennow ow lesa, po resyas dowrow ow frosa gans nerth,

¹⁹po son garow karregi ow koedha yn-nans, 18 po bestes gwyls ow poenya hag ow lamma na yll bos gweles, po son bestes an moyha gwyls ow krommya, po dasson owth aslamma dhiworth kew y'n menydhyow — an taklow ma a's palsyas gans euth.

²⁰Rag an bys oll a veu golowys gans golow splann, ha mos a-dro dh'y lavur heb lett,

²¹ha war an bobel ma aga honan nos poes a veu lesys, imaj a'n tewlder hag a veu destnys dh'aga degemmeres; mes hwath poessa ages tewlder ens i dhedha aga honan.