Read Kernewek Furneth 18 Bible Online

Furneth 18 - Kernewek bible

Furneth 18

¹Byttegyns yth esa dhe'th pobel sans golow pur vras. Aga eskerens a glewas aga lev mes ny welsons aga furv, ha rekna aga honan lowen drefenn na wodhavsens,

²ha godhvos gras nag esens ow kul drog dhedha, kyn fiens dregynnys kyns; hag i a hwilas aga gevyans drefenn aga bos eskarek dhedha.

³Yn le tewlder ty a ros dhedha koloven a dan ow leski avel gidyer rag vyaj ankoth dha bobel, ha profya dhedha howl hwar war aga vyaj gloryus.

⁴Rag aga eskerens a dhervynnas may fe golow gwithys dhiworta ha may fons prisonys yn tewlder, an re a withsa dha vebyon yn kethneth, dredha may fia golow anvarwel an lagha res dhe'n bys.

⁵Wosa i dhe evira ladha babanes dha bobel sans, hag unn flogh re bia gesys a-ves ha sawys, yn kessydhyans ty a gemmeras dhe-ves routh a'ga fleghes; ha ty a's distruis oll war-barth gans liv krev.

⁶An nos na a veu gwrys godhvedhys dhe gyns dh'agan tasow, may lowenhahens yn godhvos sur a'n tiow may trestsons ynna.

⁷Yth esa dha bobel ow kortos delivrans an re wiryon, mes distruyans aga eskerens.

⁸Rag der an keth fordh may kessydhsys agan eskerens ty a'gan gelwis dhis ha'gan glorifia.

⁹Rag yn-dann gel fleghes wiryon tus dha a wrug sakrifisow, ha gans unn akord i a assentyas dhe'n lagha dhuwel, may rannens an syns yn kepar maner an keth taklow, bennathow ha peryllow; ha seulabrys yth esens ow kana kanow gormel koth aga thasow.

¹⁰Mes kri anhwek aga eskerens a dhassonas, ha'ga hynvann pitethus rag aga fleghes a veu lesys a-les.

¹¹An mester ha'n keth a veu kessydhys gans an keth vreus, ha'n den kemmyn ha'n myghtern a wodhevis an keth koll;

¹²hag i oll war-barth, der unn eghenn mernans, a's tevo korfow diniver. Nyns o an re vew lowr dh'aga ynkleudhyas, rag yn unn pols aga agh an moyha enorys re bia distruys.

¹³Rag kyn na vynnsens krysi travyth dre reson aga husow, hwath, pan veu aga re gynsa-genys distruys, i a aswonnis bos dha bobel mab Duw.

¹⁴Rag pan esa pup-tra yn taw kosel, ha'n nos yn kres hy resegva skav,

¹⁵dha er ollnerthek a lammas dhiworth nev, yn-mes a'n tron ryel, a-bervedh yn kres an tir a dhistruyans, kasor asper ow toen kledha lymm dha worhemmynn gwiryon,

¹⁶hag ev a sevis ha lenwel pup-tra oll gans mernans, ha tochya nev hag ev ow sevel war an norvys.

¹⁷Ena a-dhesempis tarosvannow yn hunrosow euthyk a's troblas yn feur, hag euth anwaytys a dheuth warnedha;

¹⁸hag onan omma hag onan arall ena, tewlys yn-nans hanter marow, a dhiskwedhas dhedha prag yth esens ow merwel;

¹⁹rag an hunrosow a's troblas a's darwarnyas a hemma, ma nag ellens dhe goll heb godhvos prag yth esens ow kodhevel.

²⁰An prevyans a vernans a dochyas ynwedh an re wiryon, ha pla a dheuth war an routh y'n difeyth, mes an sorr ny dhuryas pell.

²¹Rag gour divlam a fistenas dhe vos aga mentenour; ev a dhros yn-rag skoes y venystri, pysadow ha offrynn ynkys; ev a sevis orth an sorr ha gorra diwedh dhe'n terroesa, ow tiskwedhes y vos dha was.

²²Ny fethas ev an sorr gans nerth y gorf, na gans fors arvow, mes der y er ev a fethas an kessydhyer, ow ri dhe'n kov tiow hag ambosow res dh'agan tasow.

²³Rag pan goedhsa seulabrys an re varow an eyl war y gila yn bernyow, ow sevel yntredha ev a skonyas an sorr, ha treghi dhe-ves y fordh dhe'n re vew.

²⁴Rag war y dhillasenn hir yth esa liwys an bys oll, hag yth esa gravys war an peswar rew a veyn glori an tasow hag yth esa dha veuredh war an diadem war y benn.

²⁵Dhe'n re ma an distruer a omblegyas, hag ev a borthas own anedha; rag lowr o unnweyth i dhe brevi an sorr.