Read Kernewek Furneth 19 Bible Online

Furneth 19 - Kernewek bible

Furneth 19

¹Mes sorr dibita a dheuth war an re dhidhuw bys y'n diwedh, rag Duw a ragwodhya an pyth a wrussens;

²fatell vynnsens, kyn hassens dha bobel dhe dhiberth ha'ga dhannvon dhe-ves yn fysk, treylya aga howsesyow ha'ga helghya.

³Rag pan esens hwath ow kyni, hag ow kul kynvann orth bedhow aga re varow, i a geworras tybyans foll arall, ha helghya avel fowesigyon an re a byssens ha konstryna dhe asa.

⁴Rag an denkys a dhendilsons a's tennas yn-rag bys y'n diwedh ma, ha gul dhedha ankevi an pyth re hwarvia, may astiverrens an pyth a fyllis a'ga thormentys,

⁵ha may tremenna dha bobel aga honan fordh varthusek, mes i aga honan a gaffa mernans ankoth.

⁶Y'n dydhyow na kreashyon oll war-lergh y natur y honan esa ow pos nowydh formys, ow servya dha worhemmynnow, may fe dha fleghes gwithys dibystik.

⁷An gommolenn a veu gwelys ow korskeusi an kamp, ha tir sygh owth omdhiskwedhes yn tyller may savsa dowr kyns, fordh heb lett yn-mes a'n mor rudh, ha plen gwelsek yn-mes a'n tonnow freudhek,

⁸dresto may tremenas avel unn genedhel an re a veu gwithys dre dha leuv, wosa mires war dha varthusyon marthys.

⁹Rag i a beuris kepar ha mergh, ha terlemmel avel eyn, orth dha wormel jy, A Arloedh, neb re's delivras.

¹⁰Rag hwath i a berthi kov a hwarvosow aga godrik, fatell wrug an dor dri gwibes yn-mes yn le enyvales, hag yn le puskes an avon a hwyjas yn-mes routh vras a gwilkynyow.

¹¹A-wosa i a welas eghenn nowydh a ydhyn, pan y's ledyas desir dhe wovynn boes dentethyel;

¹²rag, dhe walgha aga desir, rynki a dheuth yn-bann dhiworth an mor.

¹³Ny dheuth an kessydhyansow war an beghadoryon heb arwoedhyow kyns yn freudh taran, rag i a wodhevis yn ewn dre reson a'ga drogoberow; rag i a dhevnydhya kas moy kales troha estrenyon.

¹⁴Tus erell a skonya degemmeres tus na aswonnens a dho dhedha, mes an re ma a wrug kethyon a westoryon o aga masoberoryon.

¹⁵Ha moy, kessydhyans a neb eghenn a dheu war an re na, a-ban dhegemmersons estrenyon yn eskarek;

¹⁶mes an re ma, wosa i dh'aga degemmeres gans gwledhow, i a blagyas gans godhevyansow euthyk an re a gevrennsa seulabrys an keth reythyow gansa.

¹⁷I a veu gweskys ynwedh gans dellni, kepar dell veu an re orth daras an den gwiryon, pan esens kyrghynnys gans tewlder tew pubonan ow hwilas y dharas y honan.

¹⁸Rag an elvennow a janjyas aga thylleryow an eyl gans y gila, kepar dell wra an sonyow war delynn varya gnas an resyas, kyn hwyth pub son y don y honan. Hemma a yll vos gwelys yn kler pan virir orth an pyth a hwarva.

¹⁹Rag yth esa enyvales an syghtir ow pos treylys dhe re dhowrek, hag yth esa an re ow neuvya ow tremena war dir.

²⁰Tan a withas y nerth y honan hwath yn dowr, ha dowr a ankovas y alloes dhe dhifeudhi.

²¹Flammow, yn kontrari, a fyllis dhe gonsumya kig kreaturs podradow a gerdhi yn aga mysk, ha ny deudhis an boes nevek, hag a deudhis kepar ha rew.

²²Rag yn pup-tra, A Arloedh, ty re veurhas ha glorifia dha bobel; ha ny fyllsys dh'aga gweres pup-prys hag yn pub tyller.