Read Kernewek Furneth 2 Bible Online

Furneth 2 - Kernewek bible

Furneth 2

¹Rag i a leveris dhedha aga honan, ow resna yn kamm, ‘Berr ha trist yw agan bewnans, ha nyns eus remedi yn diwedh den, na nyns eus denvyth aswonnys neb a dhehwelis dhiworth ifarn.

²Rag ni a veu genys dre jons, ha wosa hemma ni a vydh kepar dell na vien bythkweth; rag an anall yn agan dewfrik yw avel mog, ha reson yw avel gwryghonenn yn gwayans agan kolonn;

³ha pan yw difeudhys, an korf a dreyl dhe lusu, ha'n spyrys a deudh dhe-ves avel ayr medhel.

⁴Agan hanow a vydh ankevys wosa termyn, ha ny berth denvyth kov a'gan oberow; agan bewnans a dremen dhe-ves kepar hag olow kommolenn, hag a vydh skattrys avel niwl yw chasys dhe-ves dre dhewynnow an howl ha fethys gans y doemmder.

⁵Rag agan termyn yw avel skeus hag a dremen dhe-ves, ha nyns eus dehwelyans vyth dhiworth agan diwedh, drefenn y vos selys fast ma na dheu denvyth arta.

⁶‘Dewgh, rakhenna, gwren ni tastya gans plesour an taklow da usi omma, ha gul devnydh leun a'n gwrians kepar hag yn yowynkneth.

⁷Lenwyn agan honan a win kostek ha melyseth, ha na as bleujenn vyth a'n gwenton dhe dremena dreson.

⁸Kurunyn agan honan gans bleujennow ros kyns i dhe wedhra.

⁹Na vedhes denvyth ahanan heb y rann yn agan goelyow balgh; gesyn toknys a'gan heudhder yn pub tyller, drefenn bos hemma agan rann, ha'gan kevrenn yw hemma.

¹⁰Arweskyn an den gwiryon boghosek; na sparyn an wedhwes, na gul vri a vlew loes an henavek.

¹¹Mes bedhes agan nerth lagha ewnder, rag an pyth yw gwann a brev y honan dhe vos diles.

¹²‘Kontrewaytyn an den gwiryon, drefenn ev dhe vos ankombrynsi dhyn hag ev a omsett orth agan gwriansow; ev a'gan keredh a beghosow erbynn an lagha, ha'gan kuhudha a beghosow erbynn agan dyskans.

¹³Ev a lever bos dhodho godhvos a Dhuw, ha gelwel y honan flogh an Arloedh.

¹⁴Ev eth ha bos dhyn keredh a'gan tybyansow;

¹⁵an wel anodho yw begh dhyn, drefenn nag yw y vewnans kepar ha tus erell, ha koynt yw y fordhow.

¹⁶Akontys on ni ganso avel bathow fug, hag ev a omwith dhiworth agan fordhow avel dhiworth taklow avlan; ev a lever diwettha penn an re wiryon dhe vos gwynnvys, ha bostya bos Duw y das.

¹⁷Gwelyn mars yw y eryow gwir, ha prevyn pyth a hwer orth penn y vewnans;

¹⁸rag mars yw an den gwiryon mab Duw, ev a'n gweres, ha'y dhelivra dhiworth leuv y eskerens.

¹⁹Prevyn ev gans despit ha torment, may hwodhvyn y jentylys, ha gul prov a'y berthyans.

²⁰Dampnyn ev dhe vernans methus, rag war-lergh an pyth a lever, ev a'n jevydh difresyas.’

²¹Yndella i a resnas, mes i a veu ledys yn sowdhan, rag aga sherewynsi a's dallas,

²²ha ny's teva godhvos a gevrinyow Duw, na govenek kavoes gobrow sansoleth, na ny dhissernsons an pewas rag enevow divlam;

²³rag Duw a wrug den rag anpodredhes, ha'y wul yn imaj y vythkwethekter y honan;

²⁴mes dre avi an jowl ankow a entras y'n norvys, ha'n re yw a'y berghennogeth a gyv prevyans a vernans.