Read Kernewek Furneth 3 Bible Online

Furneth 3 - Kernewek bible

Furneth 3

¹Mes yma enevow an re wiryon yn leuv Duw; ny wra torment nevra aga thochya.

²Yn golok tus diboell, yth hevelis i dhe vos marow, ha'ga thremen a veu akontys anfeusi,

³ha'ga dibarth dhiworthyn kepar dell ve terroes. Mes ymons yn kres.

⁴Rag mar fons i kessydhys yn golok tus, hwath aga govenek yw leun a anvarwoleth.

⁵Kyn fons nebes keredhys, i a dhegemmer meur a dhader, rag Duw a's provas ha'ga havoes wordhi anodho y honan.

⁶Ev a's provas avel owr yn forn, hag avel offrynn kowlleskys ev a's degemmeras.

⁷Yn termyn aga breus, splanna a wrons, hag avel gwryghon yn sowl i a boen a-dro.

⁸I a vreus kenedhlow ha rewlya poblow, ha'n Arloedh a reyn warnedha bys vykken.

⁹Kemmys a fydh ynno a gonvedh gwirder, ha'n re yw len a drig ynno yn kerensa, rag yma gras ha tregeredh dh'y dus dhewisys.

¹⁰Mes an re dhidhuw a vydh kessydhys dell dhervynn aga resna, an re hag a skonyas an re wiryon ha rebellya erbynn an Arloedh;

¹¹rag kemmys a dhispres furneth ha dyskans yw truan. Aga govenek yw koeg, aga lavuryow yw diles, ha'ga oberow euver.

¹²Aga gwragedh yw foll, ha'ga fleghes drog;

¹³mollothek yw aga agh. Rag bennigys yw benyn anvap yw andhefolys, neb na entras yn unyans peghus; hi a gyv frut pan hwither Duw enevow.

¹⁴Gwynn y vys ynwedh yw an spadhesik neb na wrug drogober gans y dhiwla, na devisya taklow drog erbynn Duw; rag favour arbennik a vydh diskwedhys dhodho rag y lelder, ha tyller a dhelit meur yn tempel an Arloedh.

¹⁵Rag frut lavuryow da yw gerys-da, ha ny wra an wreydhenn a gonvedhes fyllel.

¹⁶Mes ny dheu mebyon avoutroryon, dh'aga adhvetter, ha has unyans anlaghel a verow.

¹⁷Rag kyn fewons hir, hwath i a vydh akontys mann, ha wortiwedh aga henys a vydh heb enor.

¹⁸Mar ferwons yowynk, ny's tevydh govenek, na konfort yn dydh breus.

¹⁹Rag euthyk yw diwedh an henedh kammhynsek.