Read Kernewek Furneth 4 Bible Online

Furneth 4 - Kernewek bible

Furneth 4

¹Gwell yw anvabeth gans vertu, rag yn kov a vertu yma anvarwoleth, drefenn hy bos aswonnys gans Duw ha gans tus.

²Pan usi hi yn aga lok, tus a wra war hy lergh, ha pan yw gyllys i a yeun war hy lergh; ha der an oesow hi a geskerdh, kurunys gans trygh, tryghores yn kesstrif an pewasow andhefolys.

³Mes ny siwen routh an re dhidhuw gans aga askorr pals, na ny wra nagonan a'ga flansigow direyth kavoes gwreydhenn dhown, na kavoes dalghenn fast.

⁴Rag kyn teffo skorrennow rag termyn, ow sevel yn teantell, i a vydh shakys der an gwyns, ha dre nerth an gwyns i a vydh diwreydhys.

⁵An skorrennow a vydh terrys dhe-ves kyns i dhe vos leun devys, ha'ga frut a vydh diles, anadhves rag dybri, da rag mann.

⁶Rag fleghes genys a unyans anlaghel yw dustunioryon a dhrog erbynn aga herens pan y's hwither Duw.

⁷Mes an den gwiryon, kyn farwo a-varr, hwath y fydh yn powesva.

⁸Rag nyns yw kothni enorys rag hirder a dermyn, na musurys dre niver a vlydhynyow;

⁹mes konvedhes yw blew loes rag tus, ha bewnans divlam yw kothni hir.

¹⁰Yth esa gour plegadow dhe Dhuw, ha kerys veu ganso, ha trigys yn mysk peghadoryon ev a veu kemmerys yn-bann.

¹¹Ev a veu kechys yn-bann ma na ylli kammdreylya y gonvedhes ha na ylli gil toella y enev.

¹²Rag an hus a dhrog a dewlha taklow da, ha desir siansek a gammdreyl an brys sempel.

¹³Yn termyn berr ev a dheuth dhe perfydhder oes leun y vlydhynyow;

¹⁴rag y enev o plegadow dhe'n Arloedh; rakhenna ev a fistenas dh'y gemmeres dhe-ves dhiworth an kres a dhroktra. Hwath an bobel a welas ha ny gonvedhsons, na kemmeres tra a'n par ma y'n brys,

¹⁵bos gras ha tregeredh Duw gans y dus dhewisys, hag ev a with war y re sans.

¹⁶An den wiryon marow a dhampen an re dhidhuw usi ow pywa, ha yowynkneth gwrys perfydh yn skon a dhampen kothni hir an den kammhynsek.

¹⁷Rag i a wel diwedh an den fur, ha ny gonvedhons an pyth re dhevisyas an Arloedh ragdho, ha dhe by entent ev re's gwithas saw.

¹⁸I a wel, ha'y dhispresya, mes an Arloedh a's skorn, ow hwerthin orta. Wosa hemma i a dheu ha bos korfow disenorys, hag outray yn mysk an re varow bys vykken;

¹⁹drefenn ev dh'aga thewlel dilavar dhe'n dor, ha'ga shakya dhiworth an selyow; i a vydh difeythys glan, hag i a vydh yn angoes, ha'n kov anedha a wra mos dhe goll.

²⁰I a dheu gans euth pan vydh aga feghosow akontys, ha'ga drogoberow a's dampen dh'aga fas.