Read Kernewek Furneth 5 Bible Online

Furneth 5 - Kernewek bible

Furneth 5

¹Ena an den gwiryon a sav gans fydhyans meur yn golok an re re'n plagyas, ha'n re na wrug vri a'y lavuryow.

²Pan y'n gwelons, i a vydh shakys gans own euthyk, hag i a's teves marth orth an selwyans anwaytys.

³I a gews an eyl dh'y gila yn edrek, hag yn angoes an enev i a gyn, ha leverel,

⁴‘Hemm yw an den a synssyn yn ges y'n termyn eus passys ha'y wul ensampel a geredh. Ass en ni fellyon! Ni a dybi bos y vewnans muskogneth ha bos y dhiwedh heb enor.

⁵Prag y feu reknys yn mysk mebyon Duw? Ha prag usi y rann yn mysk an syns?

⁶Ytho ni a wandras dhiworth an hyns a wiryonedh, ha ny splannas golow ewnder warnan, ha ny dhrehevis an howl warnan.

⁷Lenwys veun a hynsyow anlaghedh ha distruyans, ha ni a vyajyas dre dhifeythtiryow heb fordh, mes ni re beu heb godhvos a fordh an Arloedh.

⁸Py les o agan balghder dhyn? Ha py dader a wrug agan rychys balgh dri dhyn?

⁹‘Oll an taklow na re dremenas dhe-ves avel skeus, kepar ha kannas hag a fisten dreson;

¹⁰avel gorhel hag a woel dre donnow an dowr, ha pan yw tremenys ny yllir kavoes ol vyth, na hyns a'n keyn-lester y'n tonnow;

¹¹po avel edhen, pan nij der an ayr, ny gevir prov a'y thremen; an ayr skav, gweskys dre strokosow hy eskelli ha rynnys dre nerth hy nij ow fyski, yw treusys dre wayans hy eskelli, hag a-wosa nyns eus arwoedh vyth a'y devedhyans dhe vos kevys ena;

¹²po kepar ha pan vo tennys seth orth kostenn, an ayr, wosa bos rynnys, a dheu war-barth distowgh, ma na woer denvyth hy hyns.

¹³Ytho ni ynwedh, kettell veun genys, a hedhis, ha nyns esa dhyn arwoedh a vertu dhe dhiskwedhes, mes y feun leun gonsumys yn agan sherewynsi agan honan.’

¹⁴Rag govenek an den didhuw yw avel has askall hwythys a-dro gans an gwyns, ha kepar hag ewyn chasys dhe-ves gans an hager-awel; hwythys yw kepar ha mog a-rag an gwyns, hag ev a dremen kepar ha kovadh gwester neb a wodrik saw unn nos.

¹⁵Mes an re wiryon a bew bys vykken, hag yma aga gober gans an Arloedh; ha'n Ughella a wra aga gwitha.

¹⁶Rakhenna i a dhegemmer myghternses splann, ha diadem teg dhiworth leuv an Arloedh, rag gans y leuv dhyghow ev a's kudh, ha gans y vregh ev a's gwith.

¹⁷Ev a gemmer dhodho y dhiwysykter rag y leun-arvwisk, hag arva pub kreatur rag dial y eskerens;

¹⁸ev a wisk ewnder avel lurik, ha gwirvreus avel basnett.

¹⁹Ev a gemmer sansoleth rag skoes antryghadow,

²⁰ha lymma sorr kales rag kledha, ha'n norvys a jun ganso dhe omladh erbynn y eskar anfur.

²¹Lughesennow a nij kepar ha sethow medrys yn ta, ha lamma dhiworth an kommol dhe'n gostenn, kepar dell ve dhiworth gwarak tennys yn ta,

²²ha keserennow leun a sorr a vydh tewlys kepar dell ve dhiworth towlbrenn; dowr an mor a gonner er aga fynn, hag avonyow a's beudh yn fell;

²³gwyns krev a dhrehav er aga fynn, hag avel hager-awel ev a's hwyth dhe-ves. Anlaghedh a wra difeythya an bys oll, ha gweythresow drog a dhomhwel tronys pennsevigyon.