Read Kernewek Furneth 8 Bible Online

Furneth 8 - Kernewek bible

Furneth 8

¹Hi a omystynn dhiworth unn penn a'n bys dh'y gila yn nerth, hag ordena pup-tra yn ta.

²My a's karas, ha'y hwilas dhiworth ow yowynkneth; my a vynnas hy gul ow benyn bries, ha my a goedhas yn kerensa dh'y thekter.

³Hi a dhre enor meur dh'y dineythyans nobyl dre reson hi bos trigys gans Duw, ha'n Mester a bup-tra oll a's karas.

⁴Kevrin godhvos Duw re beu dyskys dhedhi, ha hi a dhewis y oberow.

⁵Mars yw rychys pyth dhe vos desirys yn bewnans, pandr'yw moy rych ages furneth, hag a wra dhe bup-tra oll oberi?

⁶Ha mar pydh konvedhes effeythus, piw moy agessi yw gweythor a'n pythow eus?

⁷Ha mar kar nebonan ewnder, hy lavuryow yw vertus; rag hi a dhysk omrewl ha doethter, gwirvreus ha kolonnekter; nyns eus travyth yn bewnans moy dhe les rag tus ages an re ma.

⁸Ha mar yeun nebonan war-lergh prevyans ledan, hi a woer taklow a-henys, ha resna yn ewn an taklow a dheu; hi a woer sotelneth kows ha displegyans lavarow tewl; hi a ragwel arwoedhyow ha marthusyon ha siwyans an sesonyow ha'n prysyow.

⁹Rakhenna my a erviras hy hemmeres dhymm dhe driga genev, ow kodhvos hi dhe ri dhymm kusul dha ha kennerth yn prederow hag anken.

¹⁰A'y govis hi, my a gyv glori yn mysk an routhow hag enor yn golok an henavogyon, kynth ov yowynk.

¹¹My a vydh kevys lymm yn breus, hag yn golok an re alloesek my a vydh enorys.

¹²Pan dawav i a'm gorta, ha pan gowsav i a woslow orthiv; mar kowsav pella, i a worr aga diwla war aga ganow.

¹³A'y govis hi my a gyv anvarwoleth, ha gasa kovadh bythkwethek dhe'n re a dheu war ow lergh.

¹⁴My a wovern poblow, ha kenedhlow a vydh sojet dhymm;

¹⁵turans euthyk a berth own pan glewons ahanav; yn kres an routh my a dhiskwa ow honan abel, ha kolonnek yn bresel.

¹⁶Pan entrav y'm chi, my a gyv powesva gensi; rag nyns eus hwerowder vyth yn keskowethyans gensi, ha nyns eus payn vyth yn bewnans gensi, mes lowena ha joy.

¹⁷Pan dybis vy a-dro dhe'n taklow ma ynnov vi ow honan, ha'ga ombrederi y'm kolonn bos anvarwoleth yn keskowethyans gans furneth,

¹⁸hag yn kerensa gensi, delit pur, hag yn lavuryow hy diwla, rychys na fyll nevra, hag yn prevyans hy howethyans, konvedhes, hag yn kowethyans gensi, hanow da: my eth a-dro ow hwilas fatell yllyn vy hy havoes ragov vi ow honan.

¹⁹Rag my o flogh gans natur roasek, hag enev da a goedhas dhe'm rann;

²⁰po moy, drefenn ow bos da, my a dheuth yn korf andhefolys.

²¹Mes my a gonvedhas na yllis vy dalghenna furneth marnas Duw dh'y ri dhymm hag y feu poynt a gonvedhes ynwedh dhe wodhvos ro piw o hi, ytho my a elwis orth an Arloedh ha pysi, ha gans oll ow holonn my a leveris: