Read Kernewek Furneth 9 Bible Online

Furneth 9 - Kernewek bible

Furneth 9

¹‘A Dhuw a'm tasow hag Arloedh a versi, neb re wrug pup-tra oll gans dha er,

²ha dre dha furneth formya mab-den rag kavoes mestrynses war an kreaturs re wruss'ta,

³ha rewlya an bys yn sansoleth hag ewnder, ha ri breus gans enev ewnhynsek:

⁴ro dhymm an furneth a esedh ryb dha dron, ha na skon a ri dhymm tyller yn mysk dha wesyon.

⁵Rag dha was ov vy ha mab dha vaghteth, den neb yw gwann ha berr y dhydhyow, gans boghes konvedhes a vreus ha laghow;

⁶rag kyn fo nebonan perfydh yn mysk mebyon tus hwath mar nyns usi dha furneth ganso, ev a vydh gwelys avel mann.

⁷Ty re'm dewisas dhe vos myghtern a'th pobel ha breusyas war dha vebyon ha myrghes.

⁸Ty re erghis dhymm drehevel tempel war dha venydh sans, hag alter y'n sita mayth esos trigys, hevelep dhe'n tabernakel sans a bareussys dhiworth an dalleth.

⁹Yma furneth genes, hi neb a woer dha oberow hag a veu y'th lok pan wruss'ta an norvys; hi a gonvedh an pyth yw plegadow y'th lok ha'n pyth yw gwir war-lergh dha worhemmynnow.

¹⁰Dannvon hi yn-rag dhiworth an nevow sans, ha dhiworth tron dha wolewder dannvon hi, may hyll hi lavurya genev, may hylliv godhvos an pyth yw plegadow dhis.

¹¹Rag hi a woer ha konvedhes pup-tra oll, ha hi a wra ow gidya gans doethter y'm gweythresow ha'm gwitha yn hy golewder.

¹²Ena ow oberow a vydh kemmeradow, ha my a vreus dha bobel yn ewn, ha my a vydh wordhi dhe gavoes tron ow thas.

¹³Rag py den eus a yll godhvos kusul Duw? Po piw a yll dissernya pyth yw bodh an Arloedh?

¹⁴Rag tybyansow tus varwel yw ownek, ha'gan towlow yw deantell;

¹⁵rag korf podradow a boes war an enev, ha'n tabernakel a bri a boes war an brys prederus.

¹⁶Ny yllyn skant dismygi a-dro dhe'n taklow usi war an norvys, ha gans lavur ni a gyv an taklow usi a-dheragon; mes an taklow usi yn nev piw re's helerghis?

¹⁷Piw re wodhva dha gusul, marnas ty a re furneth ha dannvon dha spyrys sans a-wartha?

¹⁸Yndella hynsyow an re usi trigys war an norvys a veu settys ewn, hag y feu dyskys dhe dus an taklow yw plegadow dhis, hag i a veu selwys dre furneth.’