Read Kernewek Siragh 1 Bible Online

Siragh 1 - Kernewek bible

Siragh 1

¹RAGLAVAR Taklow pals ha bras re beu delivrys dhyn der an lagha ha'n brofoesi ha'n re erell neb a's holyas; rakhenna ni a dal gormel Ysrael rag dyskans ha furneth. Hag a-ban yw res dhe'n re a red kavoes konvedhes, res yw ynwedh dhe'n re a gar dyskans bos heweres orth an re usi trigys yn broyow erell, dre gewsel ha dre skrifa. 7 Ytho ow thas-gwynn Yesus, wosa kowal omri dhe redyans an lagha ha'n brofoesi ha lyvrow erell agan tasow, ha wosa kavoes meur a skians ynna, ev ynwedh o hembrenkys dhe skrifa neppyth a-dro dhe dhyskans ha furneth, rag may hwrella an re a gar dyski, owth aswonn an taklow ma ynwedh, spedya hwath moy ow pywa herwydh an lagha. Ynniys owgh hwi, rakhenna, dhe redya an lyver ma gans bodh da ha gans attendyans, ha dhe vos hel pan wryllyn ni, yn spit dhe ober diwysyk yn treylyans, fyllel derivas neppyth yn perfydh. Rag an pyth hag a veu derivys y'n dalleth yn Ebrow, nyns yw dhodho poran an keth styr wosa treylyans yn yeth arall. Nyns yw boghes an dyffrans y'n obe(...)

²Tewes an mor, bannaghow an glaw, ha dydhyow a drank heb worfenn, piw a yll aga nivera?

³Ughelder nev ha les an norvys, ha'n islonk ha furneth — piw a yll aga helerghi?

⁴Kyns pup-tra y feu furneth kreatys, ha konvedhes doeth a drank heb worfenn.

⁵Ger Duw y'n ughelder yw fenten furneth; ha'y fordhow yw gorhemmynnow bythkwethek.

⁶Gwreydhenn furneth — dhe biw re beu hi diskudhys? Hy devisys skentel — piw a's goer?

⁷Dhe biw re beu godhvos furneth diskwedhys, ha piw re gonvedhas hy frevyans meur?[1]

⁸Yma onan yw fur, ha dhe vos ownys yn feur, owth esedha war y se.

⁹An Arloedh y honan a's kreatyas, ev a's gwelas ha'y musura, ha'y diveri war y oberow oll.

¹⁰Dhe oll kig yma kevrenn anedhi, herwydh y ro, hag ev a's ros yn hel dhe'n re a'n kar. Own a'n Arloedh yw Gwir Furneth

¹¹Own a'n Arloedh a dhre enor ha goeth, ha heudhder ha kurun a lowena.

¹²Own a'n Arloedh a lowenha an golonn, ha ri joy ha lowena, ha bewnans hir.

¹³Neb a berth own a'n Arloedh, da vydh y rann y'n diwedh; hag yn dydh y vernans ev a vydh bennigys.

¹⁴Own a'n Arloedh yw an dalleth a furneth: ha war-barth gans an re len hi a veu kreatys y'n dorr.

¹⁵Hi a settyas hy neyth yn mysk tus, selven bythkwethek, ha hi a vydh len dha'ga has.

¹⁶Own a'n Arloedh yw lanwes a furneth, ha hi a's medhow gans hy frut.

¹⁷Hi a lenow aga chi oll gans taklow plegadow, ha'ga gwithvaow gans hy askorr.

¹⁸Own a'n Arloedh yw kurun furneth, ow kul dhe gres ha yeghes perfydh bleujyowa.

¹⁹Ev a's gwelas ha'y nivera, hag ev a dhiveris skentoleth ha godhvos a gonvedhes avel glaw, hag ughelhe glori an re a wra hy synsi fast.

²⁰Own a'n Arloedh yw an wreydhenn a furneth, ha'y skorr yw bewnans hir.

²¹Own a'n Arloedh a jas peghosow dhe-ves; hag y'n le mayth usi, ev a dreyl sorr dhe-ves.[2]

²²Ny yll sorr anewn bos justifiys, rag sorr den a boes an vantol dh'y dhiswrians.

²³Den leun a berthyans a bes kosel bys y'n pols ewn, hag a-wosa joy a dardh yn-mes dhodho.

²⁴Ev a gudh y eryow bys y'n pols ewn, ha gweusyow tus pals a dheriv a-dro dh'y skians da.

²⁵Y'n tresorvaow a furneth yma lavarow fur, mes own a Dhuw yw pyth kasadow dhe beghador.

²⁶Mar hwensydh furneth, gwith an gorhemmynnow, ha'n Arloedh a's re dhis yn hel.

²⁷Own a'n Arloedh yw furneth ha dyskybleth, hag ev a gyv delit yn lelder hag uvelder.

²⁸Na vydh diwostydh dhe own a'n Arloedh, na dos nes dhodho gans kolonn dhewblek.

²⁹Na vydh falswas yn golok tus, ha goelya dha dhiwweus.

³⁰Na ughelha dha honan, rag own ty dhe omdhisevel hag yndella dri disenor warnas dha honan. An Arloedh a dhiskudh dha gevrinyow ha'th tewlel dhe'n dor yn kres an kuntelles, drefenn na dheuthys yn own a'n Arloedh, ha dha golonn o leun a doell.