Read Kernewek Siragh 10 Bible Online

Siragh 10 - Kernewek bible

Siragh 10

¹Rewler fur a dhysk y bobel, ha rewl den a gonvedhes yw ordenys yn ta.

²Kepar ha rewler an bobel, yndella yw y soedhogyon; ha kepar ha ledyer an sita, yndella yw oll hy annedhysi.

³Myghtern heb dyskybleth a dhistru y bobel, mes sita a dyv dre gonvedhes hy rewloryon.

⁴Yma governans an norvys yn diwla an Arloedh, ha warnodho ev a dhrehav nebonan 'vas rag an termyn.

⁵Yma siwena gour yn diwla an Arloedh, hag ev a sett y enor war fas skriba an lagha. An Peghes a Woeth

⁶Na vydh serrys orth dha gentrevek rag pub pystik, ha na wra travyth dre weythresow a donteth.

⁷Goeth yw kasadow a-rag an Arloedh hag a-rag tus, ha kammhynseth yw divlas gans an dhew.

⁸Myghternses a dremen dhiworth kenedhel dhe genedhel drefenn kammhynseth ha goeth ha kevoeth.[8]

⁹Fatell yll den a dhoust ha lusu bos goethus? Rag hwath yn termyn bewnans y golodhyon a beder.

¹⁰Kleves hir a ankomber an medhek; myghtern an jydh hedhyw a verow a-vorow.

¹¹Rag pan wra den merwel ev a erit kramviles, ha goedhviles, ha pryves.

¹²Dalleth goeth den yw omdenna dhiworth an Arloedh; pan forsak an golonn hy Gwrier.

¹³Rag dalleth goeth yw peghes, ha neb a len orto a dhinew taklow kasadow avel glaw. Rakhenna an Arloedh re dhros warnedha galarow dres eghenn, ha'ga distrui yn tien.

¹⁴An Arloedh re dewlis dhe'n dor tronys rewloryon, hag ev re wrug dhe'n re uvel esedha yn aga le.

¹⁵An Arloedh re dennas yn-bann gwreydh an kenedhlow, hag ev re blansas an re isel yn aga le.

¹⁶An Arloedh re dhomhwelis tiryow an kenedhlow, hag ev re's distruis bys yn selyow an norvys.

¹⁷Ev re dennas re anedha dhe-ves ha'ga distrui, hag ev re dhefendyas kov anedha dhiworth an norvys.

¹⁸Ny veu goeth kreatys rag tus, na sorr fers rag an re genys a venynes. Tus yw Wordhi dhe Gavoes Enor

¹⁹Py agh yw wordhi dhe gavoes enor? Agh mab-den. Py agh yw wordhi dhe gavoes enor? An re a berth own a'n Arloedh. Py agh yw anwiw dhe gavoes enor? Agh mab-den. Py agh yw anwiw dha gavoes enor? An re a gammdremen erbynn an gorhemmynnow.

²⁰Yn mysk breder aga hembrenkyas yw wordhi dhe gavoes enor, ha'n re a berth own a'n Arloedh yw wordhi dhe gavoes enor a-dheragdho.

²¹Own a'n Arloedh yw dalleth kemmeradewder; mes gorthter ha balghder yw dalleth skonyans.[9]

²²An den rych, an den kevoethek ha'n den boghosek — aga bostyans yw own a'n Arloedh.

²³Nyns yw ewn dispresya den boghosek ha poellek, na nyns yw gwiw enora gour a beghes.

²⁴An ughelor, ha'n breusyas, ha'n rewler a vydh enorys, mes nyns yw onan anedha brassa es den a berth own a'n Arloedh.

²⁵Tus rydh a serv gwas fur, ha ny wra den a gonvedhes krodhvolas.

²⁶Na wra displetyans a'th furneth pan wredh dha ober, ha na vost yn termyn may fo esow dhis.

²⁷Gwell yw an den neb a ober ha dhodho palster a bup-tra, ages den a gerdh a-dro ow bostya, mes ow fyllel a vara.

²⁸Ow mab, gordh dha honan gans klorder, ha ro dhiso jy enor herwydh dha vri.

²⁹Piw a justifi an den a begh er y bynn y honan? Ha piw a enor an den a dhisenor y vewnans y honan?

³⁰Enorys yw den boghosek rag y wodhvos, hag enorys yw den rych rag y gevoeth.

³¹Den enorys yn boghosogneth — kemmys moy yn kevoeth! Ha den disenorys yn kevoeth — kemmys moy yn boghosogneth!