Read Kernewek Siragh 11 Bible Online

Siragh 11 - Kernewek bible

Siragh 11

¹Semlansow a Doell Furneth den uvel a dhrehav y benn, ha gul dhodho esedha yn mysk an vrasyon.

²Na wormel gour rag y fisment da, ha na gas den rag y semlans.

³Byghan yw gwenenenn yn mysk kreaturs a nij, mes hy askorr yw an gwella a daklow hweg.

⁴Na vost a-dro dhe wiska dillas teg, ha na ughelha dha honan y'n jydh mayth os enorys; rag gweythresow an Arloedh yw barthusek, ha'y weythresow yw kudhys dhiworth tus.

⁵Re beu res dhe lies myghtern esedha war an leur, mes onan nag o tybys anodho re wiskas diadem.

⁶Meur a rewloryon re beu disenorys yn feur, ha tus vryntin re beu daskorrys yn diwla tus erell.

⁷Na arvreus kyns ty dhe hwithra; yn kynsa preder, hag ena reprev.

⁸Na worthyp kyns ty dhe glewes, ha na wodorr den hag ev ow kewsel.

⁹Na dhadhel a-dro dhe vater na'th teur anodho, ha na esedh gans peghadoryon hag i ow preusi ken.

¹⁰Ow mab, na omgemmer negysyow pals; mar kwreta aga kressya ny vydhydh divlam. Mars edh yn-rag ny yllydh passya, hag ow fia dhe'n fo ny dhienkydh.

¹¹Yma den a lavur, hag a striv hag a fisten, mes kemmys moy y esow.

¹²Yma den arall yw lent ha dhodho edhomm a weres, neb a fyll a nerth hag yw pur voghosek, mes dewlagas an Arloedh a'n hwila dh'y les; ev a'n drehav yn-mes a'y dyller isel

¹³ha drehevel y benn; ha lies a's teva marth anodho.

¹⁴Taklow da ha drog, bewnans hag ankow, boghosogneth ha rychys, a dheu dhiworth an Arloedh.

¹⁵Furneth, skians ha konvedhes a'n lagha a dheu dhiworth an Arloedh; kerensa ha'n fordh a oberow da a dheu dhiworto.

¹⁶Toell ha tewlder a veu kreatys war-barth gans peghadoryon: ha drog a gothha gans an re yw balgh anodho.[10]

¹⁷Ro an Arloedh a dhur rag an re yw dhuwek, ha'y favour a dhre siwena bys vykken.

¹⁸Yma den yw rych der y dhiwysygneth ha'y grefni, ha hemm yw an gober res dhodho:

¹⁹pan lever ev, ‘My re gavas powes, ha lemmyn my a dheber a'm taklow da!’ ny woer ev pygemmys termyn a dremen kyns ev dh'aga gasa dhe dus erell, ha merwel.

²⁰Sav y'th gevambos ha'y attendya, ha kothha y'th ober.

²¹Na borth marth orth gweythresow peghador, mes trest y'n Arloedh ha bes gans dha hwel, rag es yw yn golok an Arloedh gul den boghosek rych, snell ha distowgh.

²²Bennath an Arloedh yw gober an den duwek, hag yn unn pols byghan Duw a wra dh'y vennath bleujyowa.

²³Na lavar, ‘Pandra eus edhomm dhymm anodho, ha pana siwena a vydh dhymm yn termyn a dheu?’

²⁴Na lavar, ‘Yma lowr dhymm, ha pana dra a yll hwarvos dhymm yn termyn a dheu?’

²⁵Y'n jydh a siwena, ankevys yw droglamm, hag yn jydh a dhroglamm, nyns yw siwena kovhes.

²⁶Rag es yw yn golok an Arloedh yn dydh mernans gobra den herwydh y fara.

²⁷Anken unn our a wra dhe dhen ankevi delit, hag yn diwedh bewnans den y fydh y weythresow diskudhys.

²⁸Na alw denvyth lowen kyns ev dhe verwel; aswonnys vydh gour der y fleghes.

²⁹Na dhoro pub den a-berth y'th chi, rag pals yw antylli an toeller.

³⁰Kepar ha grugyar-dhynya yn kowell, yndella yw brys den goethus, ha kepar hag aspier ev a attend dha goedhva;

³¹rag ev a gontrewayt, ow treylya dader dhe dhrog, ha dhe weythresow wordhi ev a re blam.

³²Dhiworth gwryghonenn a dan y teu regydh pals, ha peghador a gontrewayt rag skoellya goes.

³³Bydh war a sherewa, rag ev a dhevis drog, ma na rollo ev dhis namm a dhur.

³⁴Degemmer estren a-berth y'th chi, hag ev a'th tistemper gans trobel, hag ev a'th estrenha dhiworth dha deylu dha honan.