Read Kernewek Siragh 12 Bible Online

Siragh 12 - Kernewek bible

Siragh 12

¹Mar kwredh gweythres da, godhvydh dhe biw y'n gwredh, ha tus a woer gras dhis rag dha weythresow da.

²Gwra dader dhe dhen duwek ha ty a vydh attylys — ha kyn na vo henna ganso ev, yn sur y fydh gans an Ughella.

³Ny dheu dader vyth dhe'n den a bes yn droktra, na dhe'n den na re alusenow.

⁴Ro dhe'n den duwek, mes na weres an peghador.

⁵Gwra dader dhe dhen uvel, mes na ro dhe dhen didhuw; lest e rag kavoes y vara, ha na'n ro dhodho, rag own ev dhe'th fetha ganso; rag ty a gemmer diwweyth kemmys ha'n droktra avel talas rag oll an dader a wredh dhodho.

⁶Rag an Ughella y honan a gas peghadoryon hag ev a dal dial war dus dhidhuw.

⁷Ro dhe'n den da, mes na weres an peghador.

⁸Ny vydh kar aswonnys yn siwena, ha ny vydh eskar kudhys yn droglamm.

⁹Hegar yw eskerens gour pan yw siwen, mes pan eus droglamm warnodho, y tiberth y gar anodho hogen.

¹⁰Nevra na drest dhe'th eskar, rag kepar dell wra kober gosseni, yndella yth yw y dhroktra.

¹¹Kyn hwrello ev omuvelhe ha mos a-dro plegys dhe'n dor, kemmer with, ha bydh war anodho. Bydh dhodho kepar ha nebonan re wrug dhe weder-mires splanna, dhe surhe, na vydh gossenek yn tien.

¹²Na'n gorr dhe sevel rybos, ma na'th tomhwello ha kemmeres dha le; na'n gorr dhe esedha dhe'th leuv dhyghow, ma na assayo kemmeres dha esedh, ha wostiwedh ty a aswonn gwiryonedh ow geryow, ha bos gwenys gans an pyth a leveris vy.

¹³Piw a gemmer truedh a soener pan yw brethys gans sarf, po a nebonan neb a dheu nes dhe woedhviles?

¹⁴Yndella ny wra denvyth kemmeres truedh a dhen a goweth gans peghador, ha neb a gemmer rann yn y beghosow.

¹⁵Ev a worta genes pols, mes mar fyll dha fortun, ny worta genes pella.

¹⁶Eskar a gews yn hweg gans y dhiwweus, mes yn y golonn ev a dewl towl dhe'th tewlel yn pytt; eskar a oel gans y dhewlagas, mes mar kyv ev chons ny'n jevydh nevra lowr a'th woes.

¹⁷Mar teu droglamm warnas, ty a'n gyv ena yn kynsa; owth omwul dha weres, ev a wra dhe'th seudhel trebuchya.

¹⁸Ev a shak y benn, ha takya y dhiwla, ha hwystra lower, ha chanjya semlans y fas.