Read Kernewek Siragh 13 Bible Online

Siragh 13 - Kernewek bible

Siragh 13

¹Kusul a-dro dhe Gowethyans Piwpynag a dav pyg a vydh defolys, ha piwpynag a goweth gans den goethus a vydh kepar hag ev.

²Na dhrehav poes yw dres dha nerth, na kowethya gans den yw moy galloesek ha moy rych agesos. Fatell yll pott a bri kowethya gans kalter a horn? An pott a wysk warnedhi, hag ev y honan a vydh terrys.

³Den rych a wra droktra, ha keworra bostyans; den boghosek a wodhev drokoleth, ha res yw dhodho keworra diharesow.

⁴Mar kyllydh bos dhe les dhodho, den rych a wra devnydh ahanas, mes mars eus edhommow dhis, ev a'th forsak.

⁵Mars eus pythow dhis, ev a drig genes; ev a byll pup-tra eus genes, heb grev.

⁶Pan eus edhomm dhodho ahanas, ev a'th toell, ha minhwerthin warnas ha ri dhis govenek; ev a gews dhis yn teg ha leverel, ‘Pyth yw res dhis?’

⁷Ev a'th sham der y voes ev, bys pan y'th wakha diwweyth po teyrgweyth, ha gordhiwedh ev a wra ges ahanas. Mara'th wel a-wosa, ev a'th forsak ha shakya y benn orthis.

⁸Kemmer with na vydhydh ledys yn sowdhan, na iselhes y'th follneth.

⁹Pan wra den kevoethek dha elwel, bydh lent ow korthybi, hag ev a'th helow moy menowgh.

¹⁰Na dheus re ogas, ma na vi skonys; ha na sev re bell, ma na vi ankevys.

¹¹Na hwila kewsel ganso kepar ha'th par, ha na drest yn y eryow pals; rag ev a'th prev dre gows hir, hag ev a'th hwither yn unn vinhwerthin.

¹²Fell yw an den na with dha gevrinyow; ny spar dha bystiga na'th prisonya.

¹³Omwith, ha bydh pur war, rag yth esos ow kerdhes a-dro yn peryll a goedha.

¹⁴Pan glewydh an taklow ma y'th kosk, difun! Kar an Arloedh der oll dha vewnans, ha gelwel warnodho rag dha selwyans.[11]

¹⁵Pub kreatur a gar y hevelep, ha pubonan y gentrevek;

¹⁶Pub kreatur a geskoweth herwydh y eghenn, ha gour a len orth y hevelep.

¹⁷Pana gowethyans eus yntra bleydh hag oen? Yndella yth yw yntra peghador ha den duwek.

¹⁸Pana gres eus ynter usvil ha ki? Ha pana gres yntra den rych ha den boghosek?

¹⁹Asenes y'n gwylvos yw preydh lewyon; yn kepar maner an voghosogyon yw peurva rag an dus rych.

²⁰Uvelder yw pyth kasadow dhe'n den goethus; yn kepar maner den boghosek yw pyth kasadow dhe dhen rych.

²¹Pan drebuch den rych, skoedhys yw gans y gowetha; mes pan goedh den isel, y gowetha a'n herdh dhe-ves.

²²Pan drebuch den rych, yma dhodho lies gwereser; mar kews geryow anwiw, i a'n askus. Mar trebuch den uvel, i a'n keredh; mar kews doethter, ny woslowir orto.

²³Pan gews den rych, peub a dew, hag i a wormel y eryow dhe'n kommol. Pan gews an boghosek, i a lever, ‘Piw yw hemma?’ Ha mar trebuch, i a'n domhwel hwath moy.

²⁴Da yw rychys dhe neb yw heb pegh, ha boghosogneth yw drog yn breus an re dhidhuw.

²⁵Kolonn den a janj y fisment, po rag dader po rag droktra.

²⁶Fisment jolif yw arwoedh a golonn lowen, mes rag devisya parabolennow yma edhomm a breder skwithus.