Read Kernewek Siragh 14 Bible Online

Siragh 14 - Kernewek bible

Siragh 14

¹Gwynnvys an gour na slynkyas gans y dhiwweus ha na veu gwenys gans poen y beghosow.

²Gwynnvys an den nag yw dampnys gans y golonn y honan, ha na gollas y wovenek. Devnydhya Rychys gans Doethter

³Ny dhelledh rychys dhe wour pith, ha dhe dhen kraf, py les yw pythow?

⁴Piwpynag a guntell dre gemmeres dhiworto y honan, a guntell rag re erell, ha re erell a vew yn palster war y bythow.

⁵Mars yw den kraf dhodho y honan, dhe biw y fydh ev hel? Ny gemmer plesour yn y bythow y honan.

⁶Nyns yw denvyth kraffa ages an den yw pith dhodho y honan, ha hemm yw an kessydhyans rag y grefni.

⁷Mar kwra ev dader, dre wall y'n gwra, ha gordhiwedh ev a dhiskudh y vilta.

⁸Drog yw an den ha dhodho lagas kraf; ev a dreyl y fas dhe-ves heb aswonn tus.

⁹Nyns yw lagas den kraf pes da gans y rann, ha drog anewnder a wra dhe'n enev gwedhra.

¹⁰Lagas pith a skon bara, hag yma fowt anodho war y voes.

¹¹Ow mab, dyght dha honan yn ta, herwydh dha bygans, ha ri offrynnow gwiw dhe'n Arloedh.

¹²Porth kov, na dhelat ankow; ha ny veu diskwedhys dhis ordenans ifarn.

¹³Kyns merwel, gwra dader dhe gar; ystynn dha leuv, ha ro dhodho kemmys dell ylli.

¹⁴Na skon dydh lowen dhiso jy dha honan; ha na gyll dha rann a blesour.

¹⁵A ny wredh gasa frut dha lavur dhe dhen arall, ha'n pyth a gevsys gans gonis dhe vos rynnys dre dewlel prenn?

¹⁶Ro, ha kemmer, ha didhan dha enev, drefenn na yllir gwaytyas plesour yn ifarn.

¹⁷Oll kig a gothha avel dillasenn, rag bos an ordenans dhiworth henses, ‘Ty a verow yn sur!’

¹⁸Kepar ha delyow glas war wydhenn dew may koedh re anedha hag erell a skyll, yndella yth yw henedhow kig ha goes; an eyl a verow ha'y gila yw genys.

¹⁹Pub gweyth a boder ha ny vydh namoy, ha den a'n gwrug a dremen ganso.

²⁰Gwynnvys an gour a breder a-dro dhe furneth ha neb a resen gans konvedhes,

²¹neb a breder a'y fordhow yn y golonn hag a aswonn hy hevrinyow.

²²Hol war hy lergh kepar ha helghyas ha'y hontrewaytya war hy fordhow.

²³Neb a vir dre hy fenestri hag a woslow orth hy darasow;

²⁴neb a gamp ogas dh'y chi, ha takkya y ebil-tylda orth hy fosow;

²⁵ev a dhrehav y dylda yn hy ogas, hag a ost yn harber a'n gwella;

²⁶ev a worr y fleghes yn-dann hy skovva, hag a gamp yn-dann hy skorrow;

²⁷ev a vydh goskeusys gensi a-dhiworth an toemmder, ha triga yn hy glori.