Read Kernewek Siragh 19 Bible Online

Siragh 19 - Kernewek bible

Siragh 19

¹Oberwas medhow ny vydh rych;[15] neb a dhispres taklow byghan a fyll tamm ha tamm.

²Gwin ha benynes a led doethyon yn sowdhan, ha'n den a goweth gans horys yw pur dhiswar.

³Poder ha pryves a'n erit, ha'n enev diswar a vydh kibyes dhe-ves. Erbynn Klapp Lows

⁴Neb a drest yn tus erell yw skav y golonn, ha neb a begh a wra kamm erbynn y enev y honan.

⁵Neb a lowenha yn droktra a vydh dampnys,

⁶mes neb a gas klappya a'n jeves le a dhroktra.

⁷Bythkweth na dhaslever keskows, ha ny gellydh travyth.

⁸Na dheriv hwedhel a-dro dhe gar nag eskar, ha na'n diskudh, marnas y fia pegh ragos.

⁹Rag nebonan a'th klewas ha mires orthis, ha pan dheu an termyn ev a'th kas.

¹⁰A glewsys klapp? Gas e dhe verwel genes. Bydh hardh, ny wra ev gul dhis tardha!

¹¹Den foll a vydh yn angoes gans kyhwedhel kepar ha benyn ow tineythi flogh.

¹²Kepar ha seth yw stag yn mordhos den, yndella yth yw klapp yn torr an foll.

¹³Govynn orth kar; martesen ny'n gwrug, ha mara'n gwrug, martesen ny'n gwra arta.

¹⁴Govynn orth kentrevek; martesen ny'n leveris, ha mara'n leveris, martesen ny'n lever arta.

¹⁵Govynn orth kar; rag yn fenowgh sklander yw; na grys pub klapp a glewydh.

¹⁶Den a yll slynkya heb mynnas. Piw yw na beghas bythkweth gans y daves?

¹⁷Govynn orth dha gentrevek kyns es ty dh'y wodros; ha ro spas dhe lagha an Ughella, heb diskwedhes dha sorr dha honan.

¹⁸Own an Arloedh yw dalleth degemmeryans, ha furneth a dhendil y gerensa.

¹⁹Godhvos a worhemmynnow an Arloedh yw dyskas bewnans, ha'n re a wra taklow plegadow dhodho a dheber frut gwydhenn anvarwoleth.[16] Furneth Wir ha Fals

²⁰Own a'n Arloedh yw furneth oll, hag yn furneth oll yma keweras an lagha, ha godhvos a'y ollgalloesekter.[17]

²¹Pan lever gwas dh'y vester, ‘Ny wrav an pyth yw plegadow dhis’, hwath mara'n gwra a-wosa ev a serr an den a'n meth.[18]

²²Nyns yw godhvos a dhroktra furneth, ha nyns eus doethter yn kusul peghadoryon.

²³Yma felder, ha henn yw kasadow, hag yma den diboell, ha dhodho fowt furneth.

²⁴Gwell yw ev neb a berth own a Dhuw, ha dhodho fowt konvedhes, es den pur dhoeth a gammdremen erbynn an lagha.

²⁵Yma felder kewar mes kammhynsek, hag yma den a gamm kuvder dhe gavoes breus.

²⁶Yma losel a bleg dhe'n dor yn galarwisk, mes y golonn yw leun a doell.

²⁷Ev a gudh y fas hag omwul na yll klewes; ha pan na waytir, ev a wra dha vleynya.

²⁸Ha mar ny yll ev pegha dre fowt nerth, ev a wra droktra kettell vo chons.

²⁹Der y semlans yth aswonnir gour, ha dhe'n kynsa vu yth aswonnir den poellek.

³⁰Dillas gour, ha'y vaner a hwerthin, ha'y vaner a gerdhes, a dhiskwa pup-tra anodho.