Read Kernewek Siragh 20 Bible Online

Siragh 20 - Kernewek bible

Siragh 20

¹Taw ha Kows Yma reprev nag yw a-brys; hag yma den a dew, mes doeth yw.

²Ass yw repreva gwell es fernewi; ha neb a avow y fowt a vydh gwithys a goll.

³Ass yw da diskwedhes edrega pan os keredhys, rag yndella ty a omwith rag peghes bodhek.[19]

⁴Kepar dell yeun spadhesik war-lergh defola gwyrghes yndella yth yw neb a assay gul breus dre nerth.

⁵Yma den a dew mes prevys yw fur, ha kasadow yw den arall rag ev dhe gewsel re.

⁶Yma den a dew rag nyns eus gorthyp dhodho, ha den arall a dew rag ev dhe wodhvos an prys gwiw dhe gewsel.

⁷Den fur yw tawesek bys y'n prys gwiw, mes braggyer ha foll a dremen dres an termyn na.

⁸Piwpynag a dhevnydh re a eryow a vydh kesys, ha piwpynag a gemmer dhodho y honan an gwir dhe gewsel a vydh kesys. Lavarow Kontrari an Eyl dh'y Gila

⁹Gour a yll kavoes prow yn droglamm, ha happwayn a yll treylya dhe goll.

¹⁰Yma ro na re travyth dhe'n riyas, hag yma ro a dhre attal dewblek.

¹¹Yma kollow drefenn glori, hag yma tus re dhrehevis aga fenn dhiworth studh uvel.

¹²Yma neb a yll prena meur a bris byghan, mes ev a dal seythplek anodho.

¹³Den fur a wra dhodho y honan bos kerys da der y eryow, mes skoellys yw kortesis fellyon.

¹⁴Ny vydh gwayn dhis dre ro dhiworth diboell, rag ny vydh mar dalvosek dell dyb ev.

¹⁵Ev a re boghes hag arvreusi yn feur, ev a iger y anow kepar ha herot; ev a re kendon hedhyw hag a-vorow ev a'n daskelow. Kesys gans peub yw den a'n par na.

¹⁶Foll a lever, ‘Nyns eus kar dhymm, ha nyns eus gras a'm masoberow;

¹⁷an re a dheber ow bara a gews anhwek.’ Assa vydh lower an re a wra ges anodho, ha pygemmys prys! Kows Anwiw

¹⁸Gwell yw slynkya war an leur es slynkya gans an taves; yndella, yn skon y teu terroes an dhrogoberoryon.

¹⁹Den ongrassyes yw kepar ha hwedhel derivys yn treveth anwiw, usi pup-prys yn ganow an re drog aga megyans.

²⁰Lavar koth dhiworth ganow foll a vydh skonys, drefenn na'n deriv yn treveth wiw.

²¹Yma den neb yw lettys rag pegha gans boghosogneth, ha pan bowes ny wra y gowses y drobla.

²²Yma den a yll kelli y vewnans dre veth, po y gelli drefenn y semlans gokki.

²³Yma den a wra ambos dh'y gar rag meth, hag y dreylya yn eskar heb ken. Gowleverel

²⁴Gow yw hager namm war dhen; prest yw ev war dhiwweus an re drog aga megyans.

²⁵Gwell yw lader ages gowek usadow, mes terroes yw rann aga dew.

²⁶Gnas gowek a dhri bismer, hag yma y veth ganso pup-prys.

²⁷Neb a gews yn fur a wra avonsyans ragdho y honan, ha den doeth a bles brasyon.

²⁸Neb a wonedh y dir a ynkress y drevas, ha piwpynag a bles brasyon a wra amendys rag y gammhynseth.

²⁹Presens ha rohow a dhall dewlagas an re fur, kepar ha fronn war y anow i a dreyl keredh dhe-ves.

³⁰Furneth kudhys ha tresor mes a wel, pana les eus dhe'n eyl po dh'y gila?

³¹Gwell yw an den a gudh y follneth ages den neb a gudh y furneth.