Read Kernewek Siragh 21 Bible Online

Siragh 21 - Kernewek bible

Siragh 21

¹A beghsys, ow mab? Na wra na fella, mes pys dehwelyans a'th peghosow kyns.

²Fi a beghes avel dhiworth golok sarf; rag mar teudh nes dhe beghes, ev a'th vrath. Y dhyns yw dyns lew, ow tistrui bewnans tus.

³Pub gweythres anlaghel yw avel kledha dewvinyek; nyns eus yaghheans dhe'n goli a wra.

⁴Skruth ha tonteth a dhifeyth golusogneth; yndella y fydh chi an den balgh difeythys.

⁵Pysadow a anow an boghosek a dheu bys yn diwskovarn Duw, ha'y vreus a dheu yn uskis.

⁶Neb a gar keredh a gerdh yn olow an peghador, mes neb a berth own a'n Arloedh a goedh yn edrek yn y golonn.

⁷Neb yw krev yn kows yw aswonnys a bell; mes pan slynk, den a gonvedhes a woer henna.

⁸Piwpynag a dhrehav y ji gans arghans tus erell yw haval dhe neb a guntell meyn rag karn y vedh.

⁹Kuntelles an debeles yw haval dhe busorn a arrow lin, ha'ga diwedh yw tan ow flammya.

¹⁰Fordh an beghadoryon yw levenhes gans meyn, mes y dhiwedh yw pytt ifarn. Furneth ha Follneth

¹¹Neb a with an lagha yw mester a'y brederow, ha keweras own a'n Arloedh yw furneth.

¹²Neb nag yw konnyk ny yll bos dyskys, mes yma sleyghneth a ynkress hwerowder.

¹³Skentoleth an den fur a ynkress avel liv, ha'y gusul yw avel fenten a vewnans.

¹⁴Brys an foll yw avel seth terrys; ny yll synsi skentoleth.

¹⁵Mar klew den poellek lavar fur, ev a'n gormel ha keworra dhodho; pan y'n klew den a vew yn plesour, ev a hwerth orto ha'y dewlel a-dryv y geyn.

¹⁶Klapp an foll yw haval dhe vegh war vyaj, mes gras yw kevys yn kows an poellek.

¹⁷Lavar den doeth a vydh hwilys y'n kuntelles, hag i a ombreder a-dro dh'y eryow yn aga brys.

¹⁸Avel chi diswrys yw furneth dhe foll, ha skentoleth an den diskians, yw kows heb styr.

¹⁹Dhe'n den diboell, adhyskans yw sprallow a-dro dh'y dhewdroes, hag avel kargharow war y leuv dhyghow.

²⁰Foll a dhrehav y lev pan hwerth, mes an den fur a vinhwerth yn kosel.

²¹Dhe'n den poellek adhyskans yw haval dhe degenn owrek, hag avel breghellik war y vregh dhyghow.

²²Troes an foll a fisten yn chi, mes den gans prevyans meur a'n jeves meth a wul henna.

²³Den diboell a aspi yn chi a-dhiworth an daras, mes gour dyskys a worta yn-mes.

²⁴Chorlek yw, den dhe woslowes orth daras, mes den doeth a via duwenys der an disenor.

²⁵Gweusyow klappyoryon a gews a'n pyth nag yw aga bern, mes geryow an re dhoeth yw poesys y'n vantol.

²⁶Fellyon a gews kyns prederi, mes an re fur a breder kyns kewsel.

²⁷Den didhuw pan villik Satnas, ev a villik y enev y honan.

²⁸Hwystrer a villik y enev y honan, hag yw kasadow yn y gentreveth.