Read Kernewek Siragh 23 Bible Online

Siragh 23 - Kernewek bible

Siragh 23

¹A Arloedh, Tas ha Mester ow bewnans, na as vy dh'aga husul, ha na as vy dhe goedha dredha!

²Piw a sett hwyppys war ow frederow, ha dyskybleth furneth war ow brys, ma na'm sparyons y'm peghosow gwrys dre wall, na askusya ow[21] feghow?

³Poken ow hammweythresow a yll liesplekhe, ha'm peghosow ynkressya, ha my a goedh a-rag ow erbynnoryon, ha'm eskar a lowenha warnav.

⁴A Arloedh, Tas ha Duw ow bewnans, na ro dhymm golok howtyn,

⁵ha kemmer a-dhiworthiv drokhwans.

⁶Na'm fethes naneyl kowlogneth na lust, ha na ro vy dhe vrys diveth. Dyskybleth an Ganow

⁷Goslowewgh, ow mebyon, orth dyskybleth an ganow; ny vydh kechys neb a's gwith.

⁸Peghadoryon yw breusys der aga gweusyow; dredha an milliger ha'n orgelus a drebuch.

⁹Na as dha anow dhe vos usys dhe liow; na leverel yn usadow hanow an Sans;

¹⁰rag dell na vydh heb brewyon an gwas neb yw prest yn-dann hwithrans, yndellma neb a volleth prest yn hanow Duw ny vydh glanhes a begh.

¹¹Gour a de meur a diow yw leun a anewnder, ha nyns a an skorja a-dhiworth y ji. Mar kwra treuspass, y begh a worta ganso, ha mar ny wra vri anodho, ev a begh yn tewblek; mar te yn euver, ny vydh ewnhes, rag y ji a vydh leun a droblow. Taves Plos

¹²Yma fordh a gewsel haval dhe vernans; na vedhes kevys yn eretons Yakob! rag traow oll a'n par ma a vydh pell a'n re dhuwek, ha ny gemmerons rann yn peghosow.

¹³Na as dha anow dhe vos usys dhe yeth arow plos, rag ynni yma kows leun a begh.

¹⁴Porth kov a'th tas ha'th vamm pan esedhydh yn mysk tus vras, po ty a ankev dha honan yn aga golok, hag omdhegi avel foll dre usadow drog; ena ty a vynn na veus bythkweth genys, ha ty a volleth dydh dha dhineythyans.

¹⁵Den yw usys dhe dhevnydhya geryow arvedhus ny vydh nevra dyskyblys oll dydhyow y vewnans. Erbynn Avoutri

¹⁶Dew eghenn a dus a ynkress peghosow, ha'n tressa a dhre sorr. Enev tesek a dhew avel tan na vydh difeudhys bys pan vo konsumys; den a wra fornikashyon gans y neskar ny hedh bys pan y'n kowllesk an tan.

¹⁷Dhe dhe'n a wra fornikashyon pub bara yw hweg; ny skwithha bys pan verow.

¹⁸Gour a begh erbynn gweli y briosoleth a lever dhodho y honan, ‘Piw a'm gwel? Yma tewlder a-dro dhymm, an fosow a'm kudh, ha denvyth ny'm gwel. Pana edhomm eus dhymm a own? An Ughella ny berth kov a beghosow.’

¹⁹Ny berth own marnas a dhewlagas tus, ha ny gonvedh bos dewlagas an Arloedh deg milweyth splanna es an howl; i a wel oll fordhow tus, ha gweles rannow kevrinek.

²⁰Kyns bos pup-tra gwrys, aswonnys veu dhodho, hag yndellma y feu wosa aga bos kowlwrys.

²¹An den ma a vydh kessydhys yn stretow an sita, hag yn tyller ma na'n gwayt, ev a vydh dalghennys.

²²Yndellma yth yw gans benyn a as hy gour hag a re dhodho her dre wour arall.

²³Rag yn kynsa, hi re dhisobayas lagha an Ughella; nessa, hi re wrug treuspass erbynn hy gour; ha tressa, dre hy anvaseth reydhel hi re wrug avoutri ha dineythi fleghes dre wour arall.

²⁴Hi hy honan a vydh dres a-rag an kuntelles, hag y fydh kessydhyans war hy fleghes.

²⁵Ny wra hy fleghes gwreydhya, ha ny dheg hy skorr frut.

²⁶Hi a as kov milligys ha'y disenor ny vydh defendys dhe-ves.

²⁷An re yw gesys a aswonn nag eus travyth yw gwell es own a'n Arloedh, na travyth hwekka es koela orth gorhemmynnow an Arloedh.

²⁸Enor meur yw holya Duw, ha bos degemmerys ganso yw bewnans hir.[22]