Read Kernewek Siragh 24 Bible Online

Siragh 24 - Kernewek bible

Siragh 24

¹Gormel Furneth[23] Furneth a wormel hy honan, ha kewsel a'y glori yn kres hy fobel.

²Yn kuntelles an Ughella hi a iger hy ganow hag yn lok y luyow hi a gews a'y glori:

³‘My a dheuth yn-mes dhiworth ganow an Ughella, ha kudha an nor avel niwl.

⁴Trigys veuv y'n ughelderyow, hag yma ow thron yn koloven a gommol.

⁵My ow honan a gylghyas an kylgh a nev ha kerdhes dre dhownderyow an islonk.

⁶Yn donnow an mor hag yn oll an dor, hag yn pub pobel ha pub kenedhel my re'm beu perghennogeth.

⁷Yn mysk oll an re ma my a hwilas powesva; yn tiredh piw y trigav?

⁸‘Ena Kreador pup-tra a ros dhymm gorhemmynn, ha'm Gwrier a dhewisas tyller ow thylda. Yn-medh ev, “Bedhes dha drigva yn Yakob, ha'th eretons yn Ysrael.”

⁹Y'n dallethvos, kyns bos an bys, ev a'm gwrug, ha rag pub oes ny hedhav bos.

¹⁰Y'n tylda sans my a servyas a-ragdho, hag yndellma my a veu fastys yn Sion.

¹¹Keffrys y'n sita garadow ev a ros dhymm powesva, hag yn Yerusalem yth esa ow mestrynses.

¹²My a wreydhyas yn pobel enorys, yn rann an Arloedh, y eretons.

¹³‘My a devis ughel avel kederwydhenn yn Lebanon hag avel kypresenn war venydhyow Hermon.

¹⁴My a devis ughel avel palmwydhenn yn En-gedi, hag avel prysk ros yn Yeriko; avel olewbrenn teg y'n mes, ha tevi avel platanwydhenn ryb an dowr.

¹⁵Avel kinnamon hag aspalathus my a ros melyseth, hag avel myrr a'n gwella my a lesas blas hweg, avel galbanum hag onygha ha stakte hag avel ethenn ynkys y'n tabernakel.

¹⁶Avel terebinthenn my a lesas ow skorr, hag ow skorr yw skorr enor ha gras.

¹⁷Avel an gwinbrenn my a dheg yn-rag sawer hweg, hag ow bleujennow yw frut enor ha palster.

¹⁸Yth ov an vamm a gerensa deg, hag a own, hag a wodhvos hag a wovenek sans: res ov, ytho, drefenn ow bos heb diwedh, dhe'm fleghes oll yw henwys ragdho.[24]

¹⁹‘Dewgh dhymm, hwi a'gas beus hwans ahanav, ha bedhewgh lenwys a'm frut.

²⁰Rag an kov ahanav yw melyssa ages mel, hag ow eretons melyssa ages kribenn vel.

²¹An re a dheber ahanav a vydh nownek rag moy, ha'n re a yv ahanav a's tevydh hwath syghes.

²²Piwpynag yw gostydh dhymm ny vydh gorrys dhe veth, ha'n re a ober genev ny begh.’ Furneth ha'n Lagha

²³Oll hemma yw lyver kevambos Duw Ughella, an lagha a worhemmynnis Moyses dhyn avel eretons rag kuntellesow Yakob.

²⁴Na fyllewgh bos krev y'n Arloedh; klyj dhodho ma'th krevha: rag an Arloedh Ughella unnsel yw Duw, hag a-der ev nyns eus Selwador arall.[25]

²⁵Fenna a wra, avel Pishon, gans furneth, hag avel an Tigris yn termyn an kynsa frut.

²⁶Ev a's lenow a gonvedhes avel an Ewfrates, hag avel an Yordan yn dydhyow trevas.

²⁷Ev a dhiver dyskans avel an Nil, hag avel Gihon yn dydhyow trevas an gwin.

²⁸Ny's aswonnis an kynsa den yn leun, na ny's konvedhas an diwettha.

²⁹Rag hy frederow yw ynkressys moy ages an mor, ha'y husul downa es an islonk meur.

³⁰Ha my, my o avel gover dhiworth avon, avel kanel dowr ow mos yn lowarth.

³¹Yn-medhav, ‘My a dhowrha ow lowarth ha gorlybya ow gweliow bleujyow.’ Hag otta, ow gover a dheuth ha bos avon, hag ow avon a dheuth ha bos mor.

³²My a wra dhe dhyskans splanna avel an bora, ha my a'n diskwedh a-bell.

³³My a dhiver arta dyskans avel profoesans, ha'y asa dhe henedhow a dheu.

³⁴Gwelewgh na lavuris ragov my ow honan mes rag keniver a hwila furneth.