Read Kernewek Siragh 25 Bible Online

Siragh 25 - Kernewek bible

Siragh 25

¹An Re yw Wordhi dhe Vos Gormelys My a gemmer plesour yn tri thra, hag teg yns yn golok Duw ha denses: akord breder, kowethyans kentrevogyon, ha gwreg ha gour trigys yn kessenyans.

²Kasadow yw genev teyr eghenn a dus, ha my a gas aga bewedh: boghosek a vost, golusek a wowlever, hag avoutrer koth a fyll dhodho skians da.

³Mar ny guntellsys travyth y'th yowynkneth, fatell yllydh kavoes neppyth y'th kothni?

⁴Ass yw teg gwirvreus y'n re loes, ha henavogyon dhe gavoes kusul dha!

⁵Ass yw teg furneth tus goth, ha konvedhes ha kusul y'n re enorys!

⁶Prevyans meur yw kurun an henavogyon, ha'ga bost yw own a'n Arloedh.

⁷Yma naw tybyans a synsav y'm kolonn dhe vos gwynnvys, ha'n degves my a lev gans ow thaves: den a lowenha yn y fleghes; den a vew dhe weles terroes y eskar.

⁸Gwynnvys an gour usi trigys gans gwreg fur, hag ev neb na ar gans ojyon hag asen yewys war-barth.[26] Gwynnvys neb na slynkyas gans y daves, ha neb na servyas den a dhegre isella agesso.

⁹Gwynnvys neb a gyv skians da, hag ev neb a gews yn diwskovarn an re a vynn klewes.

¹⁰Ass yw meur an den a gyv furneth! Mes nyns eus denvyth a-ugh an den a berth own a'n Arloedh.

¹¹Own a'n Arloedh a worbass pup-tra; haval dhe biw yw an den a'n perghenn?

¹²Own a'n Arloedh yw dalleth kerensa orto, ha fydh yw dalleth glena orto.[27] Gwragedh

¹³Goli pynag, a-der goli an golonn! Sherewynsi pynag, a-der sherewynsi benyn.

¹⁴Galar pynag, a-der galar a'n re a gas! Dial pynag, a-der dial eskerens!

¹⁵Nyns eus gwenon gweth ages gwenon sarf, ha nyns eus sorr gweth ages sorr benyn. Drogedh Tebel Venyn

¹⁶Gwell via genev triga gans lew ha dragon ages triga gans tebel venyn.

¹⁷Drogedh benyn a dreyl hy semlans, ha tewlhe hy fas kepar hag ors.

¹⁸Hy gour yw esedhys[28] yn mysk an gentrevogyon, ha ny yll omwitha rag hanasa yn hwerow.

¹⁹Byghan yw pub anewnder kehevelys dhe anewnder benyn; re goettho tenkys peghador warnedhi!

²⁰Par dell yskynn treys henavek tewynn, yndellma yw gwreg davosek dhe wour kosel.

²¹Na vydh dynys gans tekter benyn, ha na dhesir benyn rag an pyth eus dhedhi.[29]

²²Yma sorr ha tonteth ha keredh meur pan yw gour skoedhys gans gwreg.

²³Iselder spyrys, fas moredhek, ha kolonn shyndys a dheu a wreg dhrog. Diwleuv ydhil ha dewlin wann a dheu a venyn na lowenha hy gour.

²⁴A venyn y teuth dalleth pegh, ha dredhi ni oll a verow.

²⁵Na as dowr dhe dheveri mes, na gwreg dhrog dhe gewsel yn hardh.

²⁶Mar ny wra dell leverydh, diberth hi ahanas dha honan.