Read Kernewek Siragh 28 Bible Online

Siragh 28 - Kernewek bible

Siragh 28

¹Neb a dhiell a gyv dial an Arloedh, hag ev a with akont stroeth a'ga feghosow.

²Gav dha gentrevek an kamm re wrug, ha dha beghosow a vydh gevys pan bysydh.

³A wra den perthi sorr erbynn den arall, ha gwaytyas yaghheans a'n Arloedh?

⁴Mar ny'n jeves nebonan mersi war dhen haval dhodho, a yll ev pysi gevyans rag y beghosow y honan?

⁵Mar kwith kig denel konnar, piw a wra dehwelyans rag y beghosow?

⁶Porth kov a dhiwedh dha vewnans, ha hepkorr eskarogeth; porth kov a legras ha mernans, ha glen orth an gorhemmynnow.

⁷Porth kov a'n gorhemmynnow ha na borth atti erbynn dha gentrevek; porth kov a gevambos an Ughella, ha na wra vri a dhiskians.

⁸Omwith rag strif, ha dha beghosow a vydh le; rag an penn-bros a enow strif.

⁹Peghador a woderr kowethyans ha hasa strif yn mysk an re hebask.

¹⁰Yn kemusur dhe'n keunys y lesk an tan, hag yn kemusur dhe'n gorthter, yndellma strif a gress; yn kemusur dhe nerth den y fydh y sorr, hag yn kemusur dh'y gevoeth ev a gress y gonnar.

¹¹Kedrynn fysk a enow tan, ha strif fysk a skoell goes. An Tebel Daves

¹²Mar hwythydh orth gwryghonenn, leski a wra; mar trewydh warnedhi, y fydh difeudhys; mes an dhew a dheu yn-mes a'th hanow.

¹³Millik an kyhwedhler ha'n den dewblek y daves, rag ev a dhistru an kres a lies.

¹⁴Sklander re shakyas lies, ha'ga skattra a genedhel dhe genedhel; ev re dhistruis sitys krev, ha domhwel chiow tus veur.

¹⁵Sklander re worras gwragedh lel a'ga threvow, ha gul dhedha kelli frut aga lavur.

¹⁶Ny wra an den a woslow orth sklander kavoes powes, na ny drig yn kres.

¹⁷Strekys hwypp a verk an kig, mes strekys taves a vrew an eskern.

¹⁸Lies re goedhas gans min an kledha, mes nyns yns i mar lies dell yw an re a goedhas drefenn an taves.

¹⁹Gwynnvys an den yw gwithys ragdho, ha na wodhevis y sorr, ha na borthas y yew, ha na veu kelmys gans y gadonyow.

²⁰Rag y yew yw yew a horn, ha'y gadonyow yw kadonyow a vrest;

²¹y vernans yw tebel vernans, hag ifarn yw gwell agesso.

²²Ny'n jeves galloes war an re dhuwek; ny vydhons leskys yn y flamm.

²³An re a eske an Arloedh a goedh yn y alloes; leski a wra yn aga mysk ha ny vydh difeudhys. Dannvenys vydh er aga fynn avel lew; avel lewpard ev a's terr dhe demmyn.

²⁴Gwayt y keydh dha dir gans spedhas, kolm dha arghans ha'th owr,

²⁵poes dha eryow yn mantol, gwra daras ha barrys rag dha anow.

²⁶Gwayt na slynki gans dha daves ma na goetthi a-rag neb a gontrewayt.