Read Kernewek Siragh 29 Bible Online

Siragh 29 - Kernewek bible

Siragh 29

¹Prestennow hag Attal An re dregeredhus a re prestenn dh'aga hentrevogyon; owth ystynn leuv heweres i a with an gorhemmynnow.

²Ro prestenn dhe'th kentrevek yn termyn y esow; attal dhe'th kentrevek y'n ewn brys.

³Gwith dha ambos ha bydh onest ganso, ha ty a gyv pup-prys an pyth a vydh edhomm dhis anodho.

⁴Lies a wel prestenn avel happwayn, ha gul kedrynn dhe'n re a's gweres.

⁵Bys pan dhegemmeras prestenn ev a amm dhe leuv den, hag iselhe y lev pan gews a bythow y gentrevek; mes yn prys attal ev a hok, hag attyli gans ambosow gwag, ha krodhvolas a-dro dhe'n termyn.

⁶Mar kwra an kresysor gwaska, ny gyv ev skant an hanter, hag ev a'n gwel avel happwayn. Mar ny wask, ev re gollas y vona, ha gul eskar anodho heb edhomm; ev a'n attal gans mollothow ha keredhyow, hag yn le golewder ev a'n attal gans disenor.

⁷Lies ytho, a nagh ri prestenn, a-der drefenn pithneth, mes drefenn own a vos frowsys heb edhomm.

⁸Byttegyns, godhav den eus yn studh uvel, ha na hok ow tiskwedhes tregeredh dhodho.

⁹Gweres den boghosek drefenn an gorhemmynn, hag yn y edhomm na'n dannvon dhe-ves gwag.

¹⁰Gwell yw kelli dha arghans a-barth broder po koweth, ha na'n gas dhe wosseni yn-dann ven dhe vos kellys.

¹¹Gwith dha dresor war-lergh gorhemmynnow an Ughella, hag y tre dhis budh moy ages owr.

¹²Dege alusen y'th tresorva, ha hi a'th delivr a bub anfeusi;

¹³gwell ages skoes krev ha guw poes, hi a ladh ragos erbynn an eskar. Mewghya Kendonow

¹⁴Gour da yw goestel rag y gentrevek, mes den neb re gollas sham a vydh falladow ragdho.

¹⁵Na ankov kuvder dha vewghyer, rag ev re ros y vewnans ragos.

¹⁶Peghador a skoell pythow y vewghyer,

¹⁷ha neb a'n jeves brys heb gras a forsak y dhelivrer.

¹⁸Bos goestel re dhiswrug lies gour hag o siwen, hag a's tewlis a-dro avel tonnow an mor; y hworras galloesogyon yn divroedh, hag i re wandras yn mysk kenedhlow estren.

¹⁹Pan wra peghador neb re gemmeras goestel siwya gwayn, ev a goedh yn kenyow lagha.

²⁰Gweres dha gentrevek gwella gylli, mes gwayt na goetthi dha honan. Tre ha Helder

²¹Edhommow bewnans yw dowr, bara ha dillas, hag ynwedh chi dhe gudha dha noethedh.

²²Gwell yw bewnans an den boghosek yn-dann goskes y do y honan, ages gwledh vryntin yn chi den arall.

²³Bydh lowen gans boghes po meur, ha ny glewydh keredh rag bos gwester.

²⁴Bewnans truan yw mos a ji dhe ji; avel gwester ny dal dhis igeri dha anow;

²⁵ty a vydh an ost ha provia diwes heb kavoes gras, ha keffrys ty a glew geryow hwerow a'n par ma:

²⁶‘Deus omma, estren, pareus an voes, ha gas vy dhe dhybri a'n pyth a' fydh.’

²⁷‘Ro spas, ty estren, dhe dhen enorys, ow broder a dheu dhe driga hag edhomm a'm beus a'n chi.’

²⁸Kales yw dhe dhen poellek perthi tavosans a-dro dhe bos gwester, hag a-dro dhe keredh an okerer.