Read Kernewek Siragh 30 Bible Online

Siragh 30 - Kernewek bible

Siragh 30

¹Dyskybleth Fleghes Ev neb a gar y vab a'n hwypp yn fenowgh, ma'n jeffo lowena y'n diwedh.

²Neb a gessydh y vab a'n jevydh lowena anodho, ha bostya anodho yn mysk aswonnesigyon.

³Neb a dhysk y vab a wra dh'y eskerens bos avius, ha lowenhe yn mysk y gowetha.

⁴Pan verow an tas ny hevel bos marow, rag ev dhe asa war y lergh onan haval dhodho,

⁵neb orto yn y vewnans ev a viras gans lowena hag yn eneworres ny veu grevys.

⁶Ev re asas war y lergh dialor erbynn y eskerens, ha nebonan dhe attyli kuvder y gowetha.

⁷Piwpynag a dhyght y vab yn re vedhel a gelm y woliow, hag orth pub kri y golodhyon a vydh troblys.

⁸Margh nag yw dovys a dheu ha bos penn-kales, ha mab digabester a vydh gorth.

⁹Bydh medhel gans flogh hag ev a'th vrowegh; gwari ganso hag ev a'th keudh.

¹⁰Na hwarth ganso, po ty a' fydh ahwer ganso, ha wortiwedh ty a dheskern dha dhyns.

¹¹Na ro dhodho rydhses yn y yowynkneth, ha na skon aswonn y gammweythresow.

¹²Pleg y warr yn y yowynkneth ha gweskel y asennow pan yw flogh, poken ev a dheu ha bos penn-kales ha bos diwostydh dhis, hag yndellma dri ahwer dhe'th enev.

¹³Ytho dyskybel dha vab ha gwra dh'y yew bos poes,[33] ma na vi sklandrys der y dhivethter.

¹⁴Gwell yw bos boghosek, yagh ha krev ages rych ha plegys yn korf.

¹⁵Gwell yw yeghes ha krevder ages owr, ha korf nerthek ages rychys diniver.

¹⁶Nyns eus golusogneth gwell ages yeghes korf, na heudhder a-ugh lowena kolonn.

¹⁷Gwell yw mernans ages bewnans a anken, ha powes bys vykken ages kleves bythkwethek. A-dro dhe Boesow[34]

¹⁸Traow dentethyel dinewys war anow degeys yw haval dhe offrynnow boes gorrys war vedh.

¹⁹Pana les yw offrynn dhe idol? Rag ny yll na dybri na blasa. Yndellma yth yw an den yw kessydhys gans an Arloedh;

²⁰ev a wel gans y dhewlagas ha krodhvolas dell hanas spadhesik pan vyrl ev gwyrghes.

²¹Na omro dhe dhuwon ha na dorment dha honan a-borpos.

²²Kolonn lowenek yw bewnans den, ha heudhder gour yw dydhyow hir.

²³Chersh dha enev ha konfort dha golonn, ha dannvon duwon pell ahanas, rag duwon re dhistruis lies, ha nevra ny dheu les anodho.

²⁴Avi ha sorr a verrha bewnans, ha preder a dhre kothni kyns y dermyn.

²⁵Den gans kolonn lowenek ha da a's tevydh les a'n boes a dheber.