Read Kernewek Siragh 35 Bible Online

Siragh 35 - Kernewek bible

Siragh 35

¹An Lagha ha Sakrifisow Gwitha an lagha a dal lies offrynn; gul vri a'n gorhemmynnow a dal sakrifia offrynn kres.[38]

²Attal kuvder a dal offrynn greun, ha ri alusen a dal offrynn grasyans.

³Omwitha rag drogedh yw plegadow dhe'n Arloedh hag omwitha rag anewnder yw prenedh.

⁴Na omdhiskwedh a-rag an Arloedh gwag dha leuv; 5 gwra oll an sakrifisow ma, herwydh an gorhemmynn.

⁵Offrynn den gwiryon a ur an alter, ha'y odour hweg a sev a-rag an Ughella.

⁶Sakrifis gour gwiryon yw kemmeradow ha ny vydh nevra ankevys.

⁷Bydh hel pan wordhydh an Arloedh, ha na leha kynsa frut dha dhiwleuv.

⁸Gans pub ro bedhes lowenek dha fas, ha sansha dha dhega gans lowender.

⁹Ro dhe'n Ughella dell ros ev dhis ha mar hel dell yllydh.

¹⁰Rag an Arloedh a attal, hag ev a attal dhis seythplek. Barn Duw

¹¹Na brof dhodho falswober, rag ny'n degemmer; ha na drest yn sakrifisow anewn;

¹²rag an Arloedh yw an barner, ha ganso nyns eus faverans.

¹³Ny dhiskwedh faverans erbynn an boghosek mes ev a glew pysadow an den dregynnys.

¹⁴Ny skon pysadow an omdhivas na'n wedhwes pan dhiver krodhvol.

¹⁵A ny wra dagrow an wedhwes resek war hy bogh ha hi ow kria erbynn an den a wra dhedha koedha?

¹⁶Ev neb a serv an Arloedh a vydh degemmerys gans favour, ha'y bysadow a dhrehedh an kommol.

¹⁷Pysadow an den uvel a wan an kommol, ha ny bowes bys pan dhrehedh an Arloedh;

¹⁸ny hedh bys pan worthyp an Ughella ha gul gwirvreus dhe'n ewnhynsek, ha gul breus.

¹⁹Rag ny vydh hyll an Arloedh hag avel gwerryor ny fronn y honan[39]

²⁰bys pan vrew klunyow an re dhidruedh ha tyli dial war an kenedhlow;

²¹bys pan dhistru routh an re orgelus, ha terri ternwelenn an re gammhynsek;

²²bys pan attal dhe bub den herwydh y weythresow hag oberow tus herwydh aga brys;

²³bys pan vreus ken y bobel ha gul dhedha lowenhe yn y dregeredh.

²⁴Teg yw tregeredh yn termyn ahwer avel kommol glaw yn termyn syghor.