Read Kernewek Siragh 36 Bible Online

Siragh 36 - Kernewek bible

Siragh 36

¹Pysadow rag Pobel Dhuw Kemmer truedh ahanan, A Arloedh Duw a beub, ha mir warnan 2 ha gorr own ahanas war oll an kenedhlow.[40]

²Drehav dha leuv erbynn kenedhlow estren ha gas dhedha gweles dha nerth.

³Dell veus sanshes ynnon a-ragdha, yndella bydh meurhes yn aga mysk a-ragon.

⁴Ha gas dhedha godhvos, dell wodhven ni, nag eus Duw marnas ty, A Arloedh.

⁵Ro arwoedhyow nowydh ha gwra anethow erell; gwra dha leuv ha bregh dhyghow dhe vos gloryus.

⁶Difun dha sorr ha dinew dha gonnar; kemmer dhe-ves an erbynner ha distru an eskar.

⁷Berrha an termyn, porth kov a'n ambos, ha gas an bobel dhe dherivas dha oberow galloesek.

⁸Gas an dianker dhe vos leskys yn sorr tanek, ha re gaffo distruyans an re a bystik dha bobel.

⁹Brew pennow pennsevigyon an eskar, a lever ‘Nyns eus denvyth marnas ni.’

¹⁰Kuntell oll loethow Yakob, ha ri dhedha oll aga eretons kepar hag y'n dalleth.

¹¹Kemmer truedh, A Arloedh, war an bobel gelwys gans dha hanow, war Ysrael a gemmersys avel dha gynsa genys.

¹²Kemmer pita orth sita dha sentri, Yerusalem, tyller dha bowesva.

¹³Lanw Sion a solempnyans dha veuredh, ha dha dempel a'th wolewder.

¹⁴Ro dustuni dhe'n re a formsys y'n dalleth, ha kollanw an profoesansow kewsys y'th hanow.

¹⁵Gober an re a wra dha wortos, ha gas dha brofoesi dhe vos lel.

¹⁶Klew, A Arloedh, pysadow dha servysi, herwydh bennath Aron war dha bobel,

¹⁷ha peub usi war an nor a wodhvydh dha vos an Arloedh, Duw an oesow. Dewisyans Gwreg

¹⁸An dorr a gemmer boes pynag, mes an eyl boes yw gwell ages y gila.

¹⁹Dell vlas an stevnik helgik divers, yndellma brys poellek a yll dissernya fals eryow.

²⁰Brys gorth yw an acheson a anken, mes den a brevyans a'n attal dhodho.

²¹Benyn a gemmer den pynag avel gour, mes unn vyrgh yw gwell ages hy ben.

²²Tekter benyn a jer an fas, hag a dremen pub hwans denel.

²³Mars yw hy thaves kuv hag uvel, hy gour yw moy feusik ages gwer erell.

²⁴Ev neb a gyv gwreg a dhalleth perghennogeth, gweres gwiw dhodho ha koloven powes.

²⁵Le ma nag eus ke, an splatt a vydh pyllys, ha le ma nag eus gwreg, gour a wander yn unn hanasa.

²⁶Rag piw a fydh yn lader skav a derlemm a dre dhe dre?

²⁷Ytho piw a fydh yn den na'n jeves neyth, neb a wodrik yn le pynag ma'n kemmer an nos?