Read Kernewek Siragh 37 Bible Online

Siragh 37 - Kernewek bible

Siragh 37

¹Fals Kowetha Pub koweth a lever, ‘My yw dha goweth ynwedh’; mes yma koweth nag yw koweth marnas yn hanow.

²A nyns yw ahwer bys y'n mernans pan dreyl keskoweth ha kar yn eskar?

³A blegyans dhe dhrog! a ble rolsys a-ji dhe gudha an dor sygh a doell?

⁴Yma keskoweth a lowenha yn siwena koweth, mes yn termyn trobel ev a dreyl er y bynn.

⁵Yma keskoweth a weres koweth erbynn eskar, ha kemmeres skoes yn-bann dh'y dhefendya erbynn eskerens.[41]

⁶Na ankov koweth yn batel,[42] ha na wra y ankevi y'th wolusogneth. Kusulyadoryon

⁷Pub kusulyador a wormel an gusul a re, mes yma neb a re kusul dh'y wayn y honan.

⁸Bydh war a gusulyador, ha godhvydh yn kynsa pyth yw y vern, rag ev a re kusul herwydh y les y honan. Ev a allsa tewlel an prenn er dha bynn

⁹ha leverel dhis ‘Dha fordh yw da’, hag ena sevel a-denewen rag gweles an pyth a hwer dhis.

¹⁰Na omgusul gans den a vir orthis gans gogrys; kudh dha gusul dhiworth an re a berth avi ahanas.

¹¹Na omgusul gans benyn a-dro dh'y hesstrivores po gans kilgi a-dro dhe vresel, gans marghador a-dro dhe gesvargenya po gans prener a-dro dhe wertha, gans kraf a-dro dhe helder po gans an den didruedh a-dro dhe guvder, gans an diek a-dro dhe ober vytholl po gans arvethesik blydhenyek a-dro dhe worfenna y ober, gans servyas diek a-dro dhe ober meur — na wra vri a gusul vyth a rons.

¹²Mes fydh yn kynsa yn gour duwel a aswonnydh avel onan a with an gorhemmynnow, ha'y vrys haval dhe'th vrys jy, ha neb a dhuwenha mar trebuchydh.

¹³Ha gas dhe gusul dha golonn dha honan sevel, rag nyns eus denvyth moy lel dhis agessi.

¹⁴Rag brys gour treweythyow a yll avisya gwell ages seyth goelyador esedhys war dour ughel.

¹⁵Mes dres oll pys dhe'n Ughella may kevarwoettho dha fordh yn gwiryonedh. Furneth Wir ha Fals

¹⁶Dadhel yw dalleth pub ober, ha kusul a dheu a-rag pub gweythres.

¹⁷Yma gwreydhyow dewis y'n brys.

¹⁸Peder furv a denkys a skyll: da ha drog, bewnans ha mernans; ha pup-prys yth yw an taves a's rewl.

¹⁹Yma gour neb yw konnyk lowr dhe dhyski lies, ha hwath bos euver dhodho y honan.

²⁰Kowser sleygh a yll bos kesys; ev a vydh gesys heb boes vytholl.

²¹Rag ny veu gras res dhodho gans an Arloedh, drefenn y fyll dhodho pub furneth.

²²Yma den a yll dyghtya y negysyow y honan, frut y gonvedhes a vydh gormelys.

²³Gour fur a dhysk y bobel y honan ha frut y gonvedhes yw len.

²⁴Gour fur a vydh lenwys a vennath, ha peub a'n gwel a'n gelow gwynn y vys.

²⁵Dydhyow bewnans gour yw niverys, mes dydhyow Ysrael yw heb niver.

²⁶Den fur a erit fydhyans yn mysk y bobel, ha'y hanow a vew bys vykken. Klorder

²⁷Ow mab, prov dha enev y'th vewnans; ha gwel pyth yw drog ragos, ha na omre dhodho.

²⁸Rag nyns yw pup-tra da rag pubonan, ha ny gyv denvyth plesour yn pup-tra.

²⁹Na vydh hwansek dhe re a voes denteth, ha na dheber heb lett;

³⁰rag yn re a voes yma kleves, ha kowlogneth a dreyl dhe hwyja.

³¹Lies re verwis a gowlogneth, mes seul a omwith anedhi a ystynn y vewnans.