Read Kernewek Siragh 40 Bible Online

Siragh 40 - Kernewek bible

Siragh 40

¹Anfeus Den Ober kales a veu kreatys rag pub den, hag yma yew boes war vebyon Adam, a-dhia'n jydh may tons yn-mes a dorr aga mamm bys y'n jydh pan dhehwelons dhe vamm pup-tra.

²Yma dhedha tybyansow troblys hag own a'n golonn, ha fienasow prederus a dhydh aga mernans.

³A'n den esedhys war y dron splann dhe'n den uvelhes yn doust ha lusu,

⁴a'n den a wisk purpur ha kurun dhe'n den yw gwiskys yn saghlenn,

⁵yma sorr hag avi ha poenvos hag ankres, hag own mernans, ha konnar ha strif. Hag yn termyn powes war y weli, y gosk yn nos a janj y vrys.

⁶Boghes po travyth yw y bowes; ev a lavur yn y gosk kepar hag y'n jydh. Troblys yw gans gwelesigeth y vrys kepar hag onan re dhienkas a'n gaslann.

⁷Pan vo pup-tra saw ev a dhifun, ha marth ganso bos an own travyth.

⁸Dhe bub kreatur, den hag enyval, mes dhe beghadoryon seythgweyth moy,

⁹y teu mernans ha krow ha strif ha kledha, terroesow ha divoetter ha diswrians ha skorja.

¹⁰Oll an re ma a veu gwrys rag an debeles, ha ragdha y teuth an liv.

¹¹Yma pup-tra eus dhiworth an dor ow tehweles dhe'n dor ha'n pyth usi dhiworth an dowrow a dehwel dhe'n mor.[47] Ny Sewen Kammhynseth

¹²Pub falswobrans ha kammhynseth a vydh dileys, mes fydhyans da a dhur bys vykken.

¹³Golusogneth an re gammhynsek a vydh desyghys avel avon, avel taran a dremen yn skon wosa kowas glaw.

¹⁴Den hel a lowenha pan iger y leuv, yndellma treuspassoryon a fyll yn tien.

¹⁵Ny wra fleghes an re dhidhuw gorra lies skorrenn yn-rag; gwreydh anyagh yns war garrek serth.

¹⁶An kors ryb pub dowr po glann avon yw diwreydhys kyns gwels vyth;

¹⁷Kuvder yw avel lowarth a vennathow, hag alusen a dhur bys vykken. Lowender Bewnans

¹⁸Bewnans yw hweg rag an den a ober ragdho y honan, ha rag an arvethesik, mes gwell es an eyl po y gila yw trovya tresor.

¹⁹Fleghes ha drehevel sita a surha hanow den, mes gwell es an eyl po y gila yw kavoes furneth. Gwarthek ha dor plynsys a wra dhe dhen siwena; mes gwreg dhivlam yw reknys gwell ages an eyl po y gila.[48]

²⁰Gwin ha menestrouthi a lowenha an golonn, mes kerensa furneth yw gwell ages an eyl po y gila.

²¹An bib ha'n delynn a wra ton hweg mes lev plegadow yw gwell ages an eyl po y gila.

²²An lagas a dhesir gras ha tekter, mes egin glas an ys yw gwell es an eyl po y gila.

²³Da pup-prys yw metya gans koweth po keskoweth, mes gwreg gans hy gour yw gwell ages an eyl po y gila.

²⁴Breder ha gweresoryon yw skoedh yn termyn trobel, mes alusen a dheliver gwell ages an eyl po y gila.

²⁵Owr hag arghans a wra dhe'n troes sevel fyrv, mes kusul dha yw synsys moy ages an eyl po y gila.

²⁶Rychys ha nerth a dhrehav an golonn mes own a'n Arloedh yw gwell ages an eyl po y gila. Nyns eus difyk yn own an Arloedh, ha ganso nyns eus edhomm a hwilas gweres.

²⁷Own a'n Arloedh yw avel lowarth a vennath, hag a gudh den gwell ages golewder vytholl. Bewnans Beggyer

²⁸Ow mab, na siw bewnans beggyer; gwell yw merwel ages beggya.

²⁹Pan virir orth moes ken den, ny yll fordh y vewnans bos synsys bewnans. Ev a dhefol y spyrys gans boesow ken den, mes gour poellek ha dyskys yn ta a omwith erbynn henna.

³⁰Yn ganow an den diveth beggya yw hweg, mes yn y dorr tan a lesk.