Read Kernewek Siragh 42 Bible Online

Siragh 42 - Kernewek bible

Siragh 42

¹Mes a'n traow ma na gemmer meth, ha na begh dhe blesya re erell:

²Na gemmer meth a lagha an Ughella ha'y gevambos, nag a ri barn dhe akwitya an re dhidhuw;

³a witha akontow gans kespar po kesvyajyoryon; po a ranna eretons kowetha;

⁴a gewerder gans mantolyow ha poesow, po a gavoes meur po boghes;

⁵a vudh ow pargenya gans marghadoryon, hag a dhyskybla fleghes yn fenowgh, hag a denna goes dhiworth keyn drog servyas.

⁶Le may ma gwreg dhislel, sel yw tra dha; ha le may ma lies leuv, alhwedh traow.

⁷Pan redh neppyth dhe nebonan rag y witha saw, gwayt y vos komptys ha poesys, ha pan redh po degemmeres, gwra kovnotenn a bup-tra yn skrif.

⁸Na gemmer meth ow tyski den gokki po foll po den pur goth yw kablus a anvaseth reydhel. Yndella ty a dhiskwa dha dhyskans gwir, ha ty a vydh kommendys gans pub den oll. Tasow ha Myrgh

⁹Myrgh yw acheson difunedh kevrinek dh'y thas, ha preder a-dro dhedhi a gemmer kosk dhe-ves; pan yw hi yowynk, rag own na dhemmettho, po wosa bos demmedhys, rag own hy bos ankerys;

¹⁰pan o gwyrgh, rag own hy bos defolys ha dos ha bos beghyek yn chi hy thas; ha wosa kavoes gour, rag own hy bos dislel, po, kynth yw hi demmedhys, rag own hy bos anvap.

¹¹Gwith yn stroeth war vyrgh worth, ma na vi skorn dhe'th eskerens, testenn a geskows y'n sita ha kuntelles an bobel, ha'th worra dhe veth a-rag lies.[49]

¹²Na as hi dhe dhiskwedhes hy thekter a-rag gour vyth, na dhe esedha ow kyhwedhla yn mysk gwragedh;

¹³rag a dhillas y teu goedhan, hag a wreg sherewynsi gwreg.

¹⁴Gwell yw drogedh gour ages benyn a wra dader; benyn yth yw a dhre meth ha diras. Gweythresow Duw yn Natur

¹⁵My a berth kov lemmyn a weythresow an Arloedh, ha disklerya an pyth a welis. Gans geryow an Arloedh y weythresow a veu gwrys; hag oll y greashyon a wra y vodh.[50]

¹⁶An howl a vir war-nans war bup-tra gans y wolow, hag ober an Arloedh yw leun a'y wolewder.

¹⁷Ny alloesegis an Arloedh y syns dhe dherivas oll y weythresow barthusek, a fastyas an Arloedh Ollgalloesek may saffo an ollvys fyrv yn y wolewder.

¹⁸Ev a hwither an islonk ha kolonn den; ev a gonvedh aga hevrinyow downa. Rag an Ughella a woer pup-tra a yll bos godhvedhys; ev a wel arwoedhyow an oes.

¹⁹Ev a dhisklos an pyth re beu ha'n pyth a vydh, hag ev a dhiskudh olow traow kel.

²⁰Ny dhiank preder vyth a-dhiworto, ha nyns eus travyth kelys a-dhiworto.

²¹Ev re ordenas splannderyow y furneth; ev a bes an keth, trank heb worfenn ha bys vykken. Nyns eus travyth a yll bos keworrys po tennys dhe-ves, ha ny'n jeves edhomm a gusulyador.

²²Ass yw desiradow y weythresow oll, bys y'n lyha gwryghonenn a yll bos gwelys!

²³Oll an traow ma a vew ha pesya bys vykken; pup-tra yw gostydh rag pub edhomm.

²⁴Pup-tra a dheu yn koplow, an eyl gorthparth y gila, ha ny wrug ev travyth yn anperfydh.

²⁵An eyl a fast vertu y gila. Piw a yll kavoes lowr ow mires orth y wolewder?