Read Kernewek Siragh 43 Bible Online

Siragh 43 - Kernewek bible

Siragh 43

¹Splannder an Howl Ass yw splann fyrmament kler an ebron, ass yw gloryus golok an nevow!

²An howl, pan omdhiskwa, a dhiskler, hag ev ow sevel, pana aneth yw, ober an Ughella.

³Dhe hanter-dydh ev a sygh an tir, ha piw a yll perthi y doemmder?

⁴Den ow hwytha fornes a ober yn gwres a lesk, mes teyrgweyth poettha yw an howl a lesk an menydhyow; ev a hwyth yn-mes ethennow tanek, ha'y dhewynnow splann a dhall an lagasow.

⁵Meur yw an Arloedh a'n gwrug; orth y worhemmynn ev a fisten war y hyns. Splannder an Loer

⁶Ev a wrug an loer ynwedh dhe servya y borpos[51] arwoedh bythkwethek ow merkya an prysyow.

⁷A'n loer y teu arwoedh dydhyow goel, golow a wannha pan worfenn hy hyns.

⁸An mis yw henwys war-lergh an loer; hi a voghha marthys yn hy threylva, golowva dhe'n luyow y'n ughelder, ow splanna yn fyrmament an nevow! Golewder an Ster ha'n Gammneves

⁹Golewder an ster yw tekter nev, aray ow terlentri yn ughelder an Arloedh.

¹⁰Orth gorhemmynn an Sans i a sev yn aga thylleryow ordenys; heb difygya yn aga goelyow.

¹¹Mirewgh orth an gammneves, ha gormel ev neb a's gwrug; fest teg yw yn hy splannder.

¹²Hi a gylgh an ebron gans hy gwarak gloryus; diwleuv an Ughella re's ystynnas. Anethow Natur

¹³Orth y worhemmynn ev a wra an ergh dhe fyski ha dannvon uskis lughes y vreus.

¹⁴Yndellma an gwithvaow yw igerys, ha'n kommol a nij yn-mes avel ydhyn.

¹⁵Yn y veuredh ev a re dhe'n kommol aga nerth, ha'n keser yw terrys dhe demmyn.

¹⁶Lev y daran a geredh an nor;[52] pan omdhiskwa, an menydhyow a gren; orth y vodh gwyns an dyghow a hwyth, keffrys ha tewedh an gogledh ha'n korwyns.

¹⁷Ev a skatter an ergh avel ydhyn ow nija, ow tiyskynna avel lokustes.

¹⁸Marth bras a'n jeves an lagas orth tekter y wynnder, ha'n brys a'n jeves marth pan goedh.

¹⁹Ev a dhiver rew war an nor avel hoelan, ha kleghi yey yw furvys avel dreyn minyek.

²⁰Gwyns oer an gogledh a hwyth ha yey yw fastys war an dowr; y teu war bub poll dowr ha'n dowr a'n gwisk avel lurik.

²¹Ev a dhevor an menydhyow ha leski an gwylvos, ha gul dhe'n gwels krina kepar ha gans tan.

²²Niwl yn uskis a yaghha pup-tra; ha'n gluth a dhiyskynn ha difres wosa an gwres.

²³Der y gusul ev a goselhas an downder ha plansa ynysow ynno.

²⁴An re a woel an mor a gews a'y beryllow, ha marth a'gan beus a'n pyth a glewyn.

²⁵Rag ynno yma kroaduryon ankoth ha barthusek, pub eghenn a daklow bew ha morviles.

²⁶Dredho pub kannas a gyv y fordh, ha der y er pup-tra yw synsys war-barth.

²⁷Ni a yll leverel moy mes heb leverel lowr; bedhes an diwettha ger: ‘Ev yw an oll.’

²⁸Ple hyllyn kavoes an nerth dh'y wormola? Rag ev yw brassa ages oll y weythresow.

²⁹Euthyk yw an Arloedh ha fest meur, ha barthusek yw y alloes.

³⁰Pan wormelowgh an Arloedh gwra y ughelhe kemmys dell yllowgh, rag ev a worbass hwath henna. Pan y'n ughelhewgh, rewgh oll agas nerth, ha na vedhewgh skwith, rag ny yllowgh y wormel lowr.

³¹Piw re'n gwelas hag a yll y dheskrifa? Ha piw a yll y veurhe dell yw?

³²Meur a daklow brassa ages an re ma yw kudhys, rag ni re welas marnas boghes a'y weythresow.

³³Rag an Arloedh re wrug pup-tra, ha dhe'n re dhuwek ev re ros furneth.