Read Kernewek Siragh 45 Bible Online

Siragh 45 - Kernewek bible

Siragh 45

¹Moyses Anodho an Arloedh a dhros yn-rag gour tregeredhus a gavas favour yn golok pub kig, kerys gans Duw ha tus, Moyses, mayth o y gov bennigys.

²Ev a'n gwrug par yn golewder dhe'n re sans, ha'y wul meur, dhe euth y eskerens.

³Der y eryow ev a wrug dhe arwoedhyow fyski;[54] an Arloedh a'n glorifias yn golok myghternedh. Ev a ros gorhemmynnow dhodho rag y bobel, ha diskudha dhodho rann a'y wolewder.

⁴Rag y lelder ha'y glorder ev a'n sakras, orth y dhewis yn-mes a gig oll.

⁵Ev a wrug dhodho klewes y lev, ha'y hembronk a-ji dhe'n tewlder, ha ri dhodho an gorhemmynnow fas orth fas, lagha bewnans hag godhvos, may tysko an kevambos dhe Yakob, ha'y varnow dhe Ysrael. Aron

⁶Ev a ughelhas Aron, gour sans haval dhodho neb o y vroder a loeth Levi.

⁷Ev a wrug kevambos bythkwethek ganso, ha ri dhodho oferyaseth an bobel. Ev a'n bennigas gans gwiskas bryntin ha gorra goen gloryus warnodho.

⁸Ev a'n gwiskas yn splannder perfydh ha'y grevhe gans arwoedhyow awtorita, an lavrek, an pows ow trehedhes bys y'n treys, ha'n efod.

⁹Hag ev a'n kylghyas gans greunavalow, gans lies klogh owrek oll a-dro rag dannvon son dell gerdhi, may fo aga son klewys y'n tempel avel kov dhe vebyon y bobel;

¹⁰gans gwisk sans, a owr ha glasrudh ha purpur, gweyth brosyer; an lurik[55] a varn, gans an arwoedhyow a wirder;

¹¹gans rudhgogh plethys, gweyth krefter; gans meyn drudh grevys avel selyow, settys yn owr, gweyth gemmweythor, dhe govhe yn lytherennow grevys, herwydh niver loethow Ysrael;

¹²gans kurun owrek war y dulyfant ha grevys, kepar ha sel, gans ‘Sansoleth’, tegenn a enor, gweyth krefter konnyk, delit dhe'n lagas, afinys yn teg.

¹³Kyns y dermyn nyns esa traow teg a'n par ma. Ny's gwiskas estren bythkweth, saw unnsel y vebyon ha'y dhiyskynnysi heb hedhi.

¹⁴Y sakrifisow a vydh kowlleskys diwweyth pub dydh heb lett.

¹⁵Moyses a'n sakras, ha'y ura gans oyl sans; y feu kevambos bythkwethek ragdho ha rag y dhiyskynnysi dydhyow oll an nev, dhe venystra dhe'n Arloedh ha servya avel oferyas ha benniga y bobel yn y hanow.

¹⁶Ev a'n dewisas yn-mes a oll an re vew dhe offrynna sakrifis dhe'n Arloedh, ynkys ha sawer hweg avel kov dhe wul prenedh rag an bobel.

¹⁷Yn y worhemmynnow ev a ros dhodho awtorita dhe wul erviransow laghel, dhe dhyski dhe Yakob an dustuniow ha golowi Ysrael yn y lagha.

¹⁸Estrenyon a vrasas er y bynn, ha perthi avi orto y'n gwylvos, an wer a-dro dhe Dathan hag Abiram ha kuntelles Koragh, yn sorr ha konnar.

¹⁹An Arloedh a'n gwelas ha displesys o, hag yn poethter y sorr distruys vons; ev a wrug anethow er aga fynn dh'aga howlleski yn flamm tanek.

²⁰Ev a geworras golewder dhe Aron ha ri dhodho eretons; ev a gevrennas dhodho an offrynnow sans, gans bara an wolok avel y rann.[56]

²¹Rag i a dheber sakrifisow an Arloedh a ros ev dhodho ha dh'y dhiyskynnysi.

²²Mes yn tir an bobel ny'n jeves eretons, ha ny'n jeves rann yn mysk an bobel; rag an Arloedh y honan yw y rann ha'y eretons. Finehas

²³Finehas mab Eleazar yw an tressa yn golewder rag bos diwysyk yn own an Arloedh, hag ev a sevis fast pan dreylyas an bobel dhe-ves, yn kolonnekter bryntin y enev; hag ev a wrug prenedh rag Ysrael.

²⁴Ytho kevambos a gres a veu gwrys ganso, may fo hembrenkyas an sentri ha'y bobel, ha ma's teffo hag ev ha'y dhiyskynnysi dynita an oferyaseth bys vykken.

²⁵Par dell veu selys kevambos gans Davydh mab Yesse a loeth Yuda, ma na dremen eretons an myghtern saw unnsel a vab dhe vab, yndellma eretons Aron yw rag y dhiyskynnysi.

²⁶Ha lemmyn bennigewgh an Arloedh, neb yw da, neb re'gas kurunas gans golewder. [57] Re wrontyo an Arloedh dhywgh furneth y'n golonn dhe varna y bobel gans gwirvreus, ma na vo kellys aga siwena, ha may pessyo aga golewder der aga henedhow oll.