Read Kernewek Siragh 46 Bible Online

Siragh 46 - Kernewek bible

Siragh 46

¹Yoshua ha Kaleb Yoshua mab Nun o galloesek yn bresel, ow siwya Moyses y'n soedh brofoesek. Ev a dheuth ha bos, herwydh styr y hanow, selwador meur a'n re dhewisys gans Duw, dhe dyli dial war an eskerens a sevis er aga fynn, may rollo dhe Ysrael y eretons.

²Ass o gloryus pan dhrehevis y dhiwleuv hag ystynn y gledha erbynn an sitys!

³Piw kyns es ev a sevis mar fast? Rag ev a woestlas bel an Arloedh.

⁴A nyns o dredho may hedhis an howl hag unn jydh a dheuth ha bos mar hir ages dew?

⁵Ev a elwis war an Ughella, an Galloesek, pan waskas eskerens warnodho a bub tu, ha'n Arloedh meur a worthybis dhodho gans keser a veur nerth.

⁶Ev a fethas an genedhel na yn batel ha war an leder ev a dhistruis y erbynnoryon, may hwodhvo an kenedhlow nerth y arvow, ev dhe omladh yn golok an Arloedh; rag ev o holyer lel a'n Galloesek.

⁷Hag yn dydhyow Moyses ev a wrug ober a dregeredh, ev ha Kaleb mab Yefunne: i a omsettyas erbynn an kuntelles, gwitha an bobel rag pegh ha koselhe aga krodhvol treus.

⁸Hag yn-mes a hwegh kans mil den war droes, ny veu nagonan gesys yn few saw unnsel an dhew ma, dhe hembronk an bobel dh'aga eretons, an tir a dhinwa leth ha mel.

⁹An Arloedh a ros krevder dhe Kaleb, a besyas bos ganso yn y gothni, mayth yskynnas y'n vro venydhyek, ha'y dhiyskynnysi a'n kavas rag eretons,

¹⁰may hwello fleghes Ysrael oll fatell yw da holya an Arloedh. An Vreusysi

¹¹An vreusysi ynwedh, pubonan gans hanow da, ma na goedhas aga holonn yn gordhyans idolys ha na dreylsons dhe-ves dhiworth an Arloedh — re bo bennigys aga hov.

¹²Re dhasvewo aga eskern a'n tyller may mons ynkleudhys, ha re bo aga hanow enorys bos treusperthys dh'aga vebyon. Samuel

¹³Samuel o kerys gans y Arloedh; profoes an Arloedh, ev a fondyas myghterneth hag untya rewloryon war y bobel.

¹⁴Herwydh lagha an Arloedh ev a vreusis an kuntelles, ha'n Arloedh a woelyas war Yakob.

¹⁵Der y lelder ev a veu prevys bos profoes ha der y eryow ev a veu aswonnys avel gwelesydh len.

¹⁶Ev a elwis war an Arloedh, an Galloesek, pan y'n gwaskas y eskerens a bub tu, hag ev a offrynnas yn sakrifis oen ow tena.

¹⁷Ena an Arloedh a darennas a-dhiworth nev, ha gul y lev dhe vos klewys gans tros meur;

¹⁸ev a fethas hembrenkysi tus Tyr hag oll gwahalyethow an Filistysi.

¹⁹Kyns termyn y gosk bythkwethek, Samuel a dhustunias a-rag an Arloedh ha'y untys: ‘Ny gemmeris gwara denvyth na hwath eskis.’ Ha denvyth ny'n kuhudhas.

²⁰Hwath wosa ev dhe verwel, ev a brofoesas ha diskwedhes y vernans dhe'n myghtern, ha drehevel y lev a'n dor yn profoesans, dhe dhilea droktra an bobel.