Read Kernewek Siragh 47 Bible Online

Siragh 47 - Kernewek bible

Siragh 47

¹Nathan War y lergh Nathan a sevis dhe brofoesa yn dydhyow Davydh. Davydh

²Dell yw an blonek kemmerys a'n offrynn kres, yndellma Davydh a veu dewisys a fleghes Ysrael.

³Ev a waria gans lewyon par dell ens mynnigow, ha gans orses par dell ens eynigow.

⁴A ny ladhas ev kowr yn y yowynkneth, ha kemmeres dhe-ves disenor an bobel, pan dhrehevis y leuv gans men y'n towlbrenn ha gweskel Goliath an boster?

⁵Rag ev a elwis war an Arloedh, an Ughella, neb a ros nerth dh'y leuv dhyghow dhe weskel kasor galloesek dhe'n leur, hag ughelhe nerth y bobel.

⁶Ytho i a'n enoras rag an degow a vilyow a fethas, ha'y ganmel rag bennathow an Arloedh, pan veu res dhodho diadem a wolewder.

⁷Rag ev a dhistruis y eskerens a bub tu, ha dri dhe dravyth y erbynnoryon, an Filistysi; ev a vrewis aga hevoeth bys y'n jydh hedhyw.

⁸Yn oll y oberow ev a ros gras dhe'n Sans, an Ughella, gans geryow golewder; ev a ganas gormel gans oll y golonn, hag ev a garas y Wrier.

⁹Ev a worras kanoryon a-rag an alter, rag gul menestrouthi hweg gans aga lev.

¹⁰Ev a ros tekter dhe'n goelyow, ha restra aga thermyn dres an vlydhen, may hwormelsons hanow sans Duw, ha'n sentri a dhassonas a'n myttin a-varr.

¹¹An Arloedh a dhileas y beghosow hag ughelhe y alloes bys vykken; ev a ros dhodho kevambos myghternses ha tron gloryus yn Ysrael. Solomon

¹²War y lergh mab fur a sevis hag a'y wovis ev o trigys yn sawder:

¹³Solomon a reynyas yn oes a gres, drefenn Duw dhe wul kosel oll y oryon, may treheffo chi yn y hanow ha pareusi sentri dhe sevel bys vykken.

¹⁴Ass esta fur y'th yowynkneth! Ty a worliva gans konvedhes kepar hag avon.

¹⁵Dha dhelanwes a lesas der an nor, ha ty a'n lenwis gans parabolennow down aga styr.

¹⁶Dha hanow a hedhas dhe ynysow pell, ha ty o kerys drefenn dha reyn hebask.

¹⁷Dha ganow, dha henlavarow, dha barabolennow ha'n gorthybow a resys o revedh dhe'n kenedhlow.

¹⁸Yn hanow an Arloedh Duw, yw gelwys Duw Ysrael, ty a guntellas owr avel sten hag arghans avel plomm.

¹⁹Mes ty a dhros benynes dhe wrowedha rybos ha dre dha gorf ty a veu dres yn gostytter.

²⁰Ty a worras namm war dha enor ha defola linyeth dha deylu, may tresys sorr war dha fleghes, ha duwenys ens dre dha follneth,

²¹drefenn bos rynnys an sovranedh ha ruvaneth trehwelek a sevis yn-mes a Efraym.

²²Mes ny as an Arloedh nevra y dregeredh, na gasa dh'y oberow mos dhe goll; ny dhile nevra henedh y dhen dewisys, na distrui has an den a'n kar. Ytho ev a ros remenant dhe Yakob, ha dhe Davydh gwreydhenn yn-mes anodho. Rehoboam ha Yeroboam

²³Solomon a bowesas gans y dasow, ha gasa war y lergh onan a'y vebyon, efan yn follneth ha fowt a skians dhodho, Rehoboam, neb a dreylyas an bobel der y gusul dhe worthsevel. Ena Yeroboam mab Nebat a ledyas Ysrael dhe begha ha settya Efraym war an fordh a beghes.

²⁴Aga feghosow a ynkressyas moy ha moy, bys pan vons divres a'ga thir.

²⁵Rag i a hwilas pub eghenn a dhrogedh, bys pan dheuth dial warnedha.