Read Kernewek Siragh 48 Bible Online

Siragh 48 - Kernewek bible

Siragh 48

¹Elias Ena Elias a sevis, profoes avel tan, ha'y er a loskas avel faglenn.

²Ev a dhros divoetter warnedha, ha der y dhiwysykter ev a lehas aga niver.

³Dre er an Arloedh ev a dhegeas an nevow, hag ynwedh teyrgweyth ev a dhros tan war-nans.

⁴Ass esta gloryus, Elias, y'th weythresow marthys! Piw ganso usi an gwir dhe vostya avelos?

⁵Ty a dhrehevis den marow a vernans ha dhiworth ifarn, der er an Ughella.

⁶Ty a dhannvonas myghternedh dhe dhistruyans, ha gwer a vri, a'ga gweliow kleves.

⁷Ty a glewas keredh yn Sinay ha barnow dial yn Horeb.

⁸Ty a untyas myghternedh dhe dyli dial ha profoesi dhe holya war dha lergh.

⁹Ty a veu kemmerys yn-bann gans korwyns a dan, yn charett gans mergh tanek.

¹⁰Y'n termyn ordenys, yth yw skrifys, ty yw destnys dhe hebaskhe sorr an Arloedh kyns ev dhe dhyllo yn konnar, dhe dreylya kolonn an tas dh'y vab, ha dhe dhassevel loethow Yakob.

¹¹Gwynn aga bys an re a'th welas, hag a goskas y'th kerensa! Rag ni ynwedh a vew yn sur. Elisha

¹²Pan veu Elias maylys y'n korwyns Elisha a veu lenwys a'y spyrys. Ev a wrythyas diwweyth kemmys a arwoedhyow, hag anethow gans pub lavar a'y anow. Bythkweth yn y vewnans ny grenas a-rag pennsevik vyth, na ny ylli denvyth y ownekhe.

¹³Nyns esa travyth re gales ragdho, ha wosa y vernans, y gorf a brofoesas.

¹⁴Yn y vewnans ev a wrug anethow, hag yn mernans y weythresow o barthusek.

¹⁵Yn despit dhe oll hemma nyns o edregus an bobel, na ny eskassons aga feghosow, bys pan vons degys dhe-ves avel preydh a'ga thir, hag a veu skattrys der oll an nor. An bobel o gesys boghes aga niver mes gans rewler a ji Davydh.

¹⁶Re anedha a wrug an pyth o plegadow, mes re erell a beghas moy ha moy. Hezekia

¹⁷Hezekia a geras y sita, ha dri dowr a-ji ynni; ev a balas der an garrek gans toulow a horn, ha drehevel dowrarghow.

¹⁸Yn y dermyn Sennagherib a dheuth yn-bann; ev a dhannvonas an Rabshake hag omdenna; ev a dhrehevis y dhorn erbynn Sion, ha bostya meur yn y valghder.

¹⁹Ena aga holonnow ha'ga diwleuv a grenas, hag yth esens yn angoes, avel gwragedh yn gwelivesi.

²⁰Mes i a elwis war an Arloedh tregeredhus, owth ystynn aga diwleuv war-tu hag ev. An Sans a's klewas distowgh dhiworth nev, ha'ga livra dre leuv Ysay.

²¹Ev a weskis kamp an Assyrianys, ha'y el a's distruis.

²²Rag Hezekia a wrug an pyth o plegadow dhe'n Arloedh, hag omwitha krev dhe fordhow y hendas Davydh, dell veu gorhemmynnys gans an profoes Ysay neb o meur ha lel yn y welesigethow. Ysay

²³Yn dydhyow Ysay an howl eth war dhe lergh, hag ev a ystynnas bewnans an myghtern.

²⁴Der y spyrys krev ev a welas an pyth a dho, ha konfortya an gynoryon yn Sion.

²⁵Ev a dhiskwedhas an pyth a dho bys yn diwedh termyn, ha'n traow kudhys kyns i dhe hwarvos.