Read Kernewek Siragh 50 Bible Online

Siragh 50 - Kernewek bible

Siragh 50

¹Simon Mab Onias Hembrenkyas y vreder ha goeth y bobel o an arghoferyas, Simon mab Onias, neb yn y vewnans a ewnhas an chi, hag yn y dhydhyow y feu kerys an tempel.[59]

²Ev a worras an selveyn dhe'n fosow ughel dewblek, an fosow ughel a-dro dhe oryon an sentri.

³Yn y dhydhyow dowrargh a veu pelys, kreun dowr avel an mor yn kompas.

⁴Ev a ombrederis fatell sawya y bobel a derroes, ha kera an sita erbynn esedhva.

⁵Ass o gloryus, kyrghynnys gans an bobel, dell dheuth yn-mes a vayl an sentri!

⁶Avel sterenn an myttin yn mysk an kommol, avel an loer leun y'n dydhyow apoyntys;

⁷avel an howl ow splanna war dempel an Ughella, avel an gammneves ow terlentri yn kommol splann;

⁸avel rosennow yn dydhyow an kynsa frut, avel alow ryb fenten a dhowr, avel egin glas war Lebanon yn jydh a'n hav;

⁹avel tan hag ynkys yn ynkyslester, avel lester a owr mortholys afinys gans pub eghenn a veyn drudh;

¹⁰avel olewbrenn kargys gans frut, hag avel kypresenn a dyv bys y'n kommol.

¹¹Pan wiskas an goen gloryus hag omwiska yn splannder perfydh, ev eth yn-bann dhe'n alter sans, ha gul klos an sentri dhe vos gloryus.

¹²Pan dhegemmeras an rannow a dhiwleuv an oferysi, hag ev ow sevel ryb oeles an alter gans garlont a'y vreder a-dro dhodho, ev o haval dhe gederwydhenn yowynk yn Lebanon yn mysk palmwydh oll a-dro.

¹³Oll mebyon Aron yn aga golewder a synsis offrynn an Arloedh yn aga diwleuv a-dherag oll kuntelles Ysrael.

¹⁴Ow korfenna an servis orth an alter, hag owth araya an offrynn dhe'n Ughella, an Ollgalloesek,

¹⁵ev a ystynnas y leuv rag an hanaf ha diveri offrynn diwes a woes an gwinreun; ev a'n diveris orth troes an alter, sawer plegadow dhe'n Ughella, Myghtern pubonan.

¹⁶Ena mebyon Aron a armas; i a hwythas aga hirgern a vetol mortholys; i a sonas tros meur dhe vos klewys avel kov a-rag an Ughella.

¹⁷Ena oll an bobel war-barth yn uskis a goedhas dhe'n dor war aga fas dhe wordhya aga Arloedh, an Ollgalloesek, an Duw Ughella.

¹⁸Ena an ganoryon a'n gormolas gans aga levow, gans tonyow hweg a velodi ow tasseni.

¹⁹Ha'n bobel a bysis an Arloedh Ughella gans pysadow a-rag an Duw tregeredhus, bys pan veu solempnita an Arloedh gorfennys, hag i a gowlwrug y servis.

²⁰Ena Simon a dhiyskynnas ha drehevel y dhiwleuv dres oll kuntelles mebyon Ysrael, dhe ri bennath an Arloedh gans y dhiwweus ha dhe wordhya y hanow;

²¹hag i a omblegyas nessa treveth yn gordhyans, dhe dhegemmeres bennath an Ughella. Bennath

²²Ha lemmyn bennigewgh an Duw a bup-tra, a wra anethow meur yn pub le, hag ynkressya agan dydhyow a-dhia'n dorr, ha dyghtya genen war-lergh y dregeredh.

²³Re rollo dhyn lowena a'n golonn, ha re bo kres yn agan dydhyow yn Ysrael, kepar hag y'n dydhyow a-henys.

²⁴Re afytthyo dhyn y dregeredh, ha'gan delivra yn agan dydhyow. Pennlavar

²⁵Yma diw genedhel yw kasadow dhe'm enev, ha'n tressa nyns yw kenedhel:

²⁶an re yw trigys yn menydh Seir, ha'n Filistysi, ha'n bobel foll usi trigys yn Shekem.

²⁷Dyskans yn konvedhes ha godhvos re skrifis vy y'n lyver ma, Yesus mab Eleazar mab Siragh a Yerusalem, neb a dhiveris furneth a'y golonn.

²⁸Gwynn y vys seul a'n jeves bern gans an traow ma. Seul a's tresor yn y golonn a vydh fur.

²⁹Rag mara's gwra, ev a vydh krev lowr rag pup-tra, rag golow an Arloedh a splann war y hyns.