Read Kernewek Siragh 51 Bible Online

Siragh 51 - Kernewek bible

Siragh 51

¹Pysadow Yesus Mab Siragh My a re gras dhis, A Arloedh ha Myghtern, ha my a'th wormel, A Dhuw ow Selwyas. My a re gras dhe'th hanow

²drefenn dha vos ow difresyas ha'm gwereser ha ty a dhelivras ow horf a dhistruyans hag a'n antell a daves a sklander, hag a dhiwweus a wowlever. Erbynn ow erbynnoryon ty re beu ow gwereser,

³ha ty a'm delivras yn meuredh dha dregeredh ha'th hanow, dhiworth dyns parys dhe'm devorya, dhiworth leuv an re esa ow hwilas ow bewnans, dhiworth an ankenyow pals a berthis,

⁴dhiworth tag an tan a bub tu, ha dhiworth kres an tan na enowis vy,

⁵dhiworth downder torr ifarn, ha dhiworth taves avlan ha geryow gow —

⁶sklander taves kammhynsek derivys dhe'n myghtern. Ow enev a dheuth nes dhe ankow, hag yth esa ow bewnans ogas dhe ifarn a-woeles.

⁷I a'm kyrghynnas a bub tu, ha nyns esa denvyth dhe'm gweres; my a hwilas sokor denel, ha nyns esa travyth.

⁸Ena my a borthas kov a'th tregeredh, A Arloedh, ha'th ober a-henys, ty dhe selwel an re a'th worta ha'ga sawya a leuv aga eskerens.

⁹Ha my a dhannvonas ow fysadow yn-bann a'n nor, ha pysi delivrans dhiworth mernans.

¹⁰My a elwis, ‘Arloedh, ty yw ow Thas, na'm forsak yn dydhyow anken, pan nag eus gweres erbynn an re orgelus.

¹¹My a wormel dha hanow heb hedhi, ha kana hymnys grasyans.’ Ow fysadow a veu klewys,

¹²rag ty a'm sawyas a dhistruyans ha'm delivra yn termyn anken. Rakhenna my a re grasow dhis ha'th wormel, ha my a vennik hanow an Arloedh. Gwersow Ebrow[60] Rewgh grasow dhe'n ARLOEDH, rag ev yw da; rag y dregeredh a dhur bys vykken. Rewgh grasow dhe Dhuw an gormoledhow, rag y dregeredh a dhur bys vykken. Rewgh grasow dhe withyas Ysrael, rag y dregeredh a dhur bys vykken. Ro grasow dhodho neb a formyas pup-tra rag y dregeredh a dhur bys vykken. Rewgh grasow dhe dhasprenyas Ysrael, rag y dregeredh a dhur bys vykken. Rewgh grasow dhe neb a guntell an re skattrys a Ysrael, rag y dregeredh a dhur bys vykken. Rewgh grasow dhodho neb a dhastrehevis y sita ha'y sentri, rag y dregeredh a dhur bys vykken. Rewgh grasow dhodho neb a wra korn dhe skylla rag chi Davydh, rag y dregeredh a dhur bys vykken. Rewgh grasow dhodho neb re dhewisas mebyon Sadok dhe vos ofery(...)

¹³Pan en hwath yowynk, kyns mones war ow thravalyow, my a hwila furneth yn igor y'm pysadow.

¹⁴A-rag an tempel my a's pysis, ha my a's hwila bys y'n diwedh.

¹⁵A-dhia'n kynsa bleujenn bys pan adhvesis an gwinreun ow holonn a lowenhas ynni; ow throes a gerdhas yn ewnhynseth; a-dhia'm yowynkneth my a holyas hy olow.

¹⁶My a blegyas ow skovarn nebes ha'y degemmeres, ha my a gavas dhe'm honan meur dhyskans.

¹⁷My a avonsyas ynni; dhodho neb a re furneth my a re golewder.

¹⁸Rag my a erviras bewa war-lergh furneth, ha my o diwysyk rag an da, ha nevra ny vydhav toellys.

¹⁹Ow enev a strivyas gensi, hag y'm fara my o stroeth. My a ystynnas ow diwleuv dhe nev, ha kyni ow diskians anedhi.

²⁰My a settyas ow enev dhedhi, hag yn puredh my a's kavas. Dredhi my a waynyas konvedhes a'n dalleth; yndellma ny vydhav nevra eskesys

²¹Ow holodhyon o troblys orth hy hwilas; rakhenna my re waynyas tresor da.

²²An Arloedh a ros dhymm ow thaves yn gober, ha my a'n gormel ganso.

²³Dewgh nes dhymm, hwi hag yw andhyskys, ha triga y'n chi a dhyskans[61].

²⁴Prag y leverowgh y fyll dhywgh an traow ma, ha prag y hwovedhowgh kemmys syghes meur?

²⁵My a igoras ow ganow ha leverel, Prenewgh hi rag agas honan heb arghans.

²⁶Gorrewgh agas konna yn-dann an yew, ha gesiwgh agas enev dhe dhegemmeres dyskans; yn ogas yth yw kavadow.

²⁷Gwelewgh gans agas lagasow agas honan na lavuris marnas boghes ha kavoes dhymm hebaska meur.

²⁸Klewewgh marnas boghes a'm dyskans, ha dredhov y kevowgh arghans hag owr.

²⁹Re lowenhaho agas enev yn tregeredh Duw, ha nevra re vowgh methek orth y wormel.

³⁰Gwrewgh agas ober yn termyn da, hag yn y dermyn y honan ev a re dhywgh agas gober.