Read Kernewek Ysay 10 Bible Online

Ysay 10 - Kernewek bible

Ysay 10

¹Go-i neb a wra ordenansow kammhynsek, ha'n skriforyon neb a skrif laghys anewn,

²dhe dreylya dhe-ves an edhommogyon dhiworth aga gwiryow, ha dhe ladra gwirvreus dhiworth boghosogyon ow fobel, rag may fo gwedhwesow aga freydh, ha may pyllons omdhivasow.

³Pandr'a wrewgh yn dydh kessydhyans, hag y'n annawel a dheu a bellder? Piw y poenyowgh dhodho rag gweres, ha ple hwrewgh gasa agas golewder,

⁴ma na blattyowgh yn mysk an brisnoryon, na koedha yn mysk an re ledhys? Yn despit dhe oll hemma ny dreylyas y sorr, ha'y leuv yw hwath ystynnys.

⁵Ogh, Assyria, gwelenn ow sorr! an fust yn aga leuv yw ow honnar.

⁶My a'n dannvon erbynn kenedhel ansans, hag erbynn pobel ow sorr my a'n gorhemmynn, dhe bylla, ha dhe dhalghenna preydh, dh'aga threttya avel leys an stretys.

⁷Mes nyns yw hemma y vodh, na ny breder y golonn yndella; mes yma yn y golonn dhe distrui ha dhe dreghi dhe-ves kenedhlow nag yns nebes.

⁸Rag yn-medh ev, ‘A nyns yw oll ow fennsevigyon myghternedh?

⁹A nyns yw Kalno avel Karkemish? A nyns yw Hamath avel Arpad? A nyns yw Samaria avel Damaskus?

¹⁰Kepar dell wrug ow leuv kavoes gwlaskordhow an idolys, may feu aga imajys gravys moy es imajys Yerusalem ha Samaria,

¹¹a ny wrav dhe Yerusalem ha'y idolys kepar dell wrug vy dhe Samaria ha'y imajys?’

¹²Ytho pan dhiwedh an Arloedh oll y ober war venydh Sion hag yn Yerusalem, my a gessydh frut kolonn goethus myghtern Assyria, ha balghder y dhewlagas howtyn.

¹³Rag yn-medh ev, ‘Dre nerth ow leuv re'n gwrug vy, ha der ow furneth, rag bos genev konvedhes. My re removas oryon poblow, ha ravna aga thresorvaow, ha dri rewloryon dhe'n dor avel kasor nerthek.

¹⁴Ow leuv re gavas, avel neyth, rychys an poblow; ha kepar dell guntellir oyow forsakys, yndella my re guntellas oll an norvys; nagonan ny wayas askell na igeri y anow, na gryllya.’

¹⁵A wra an voel bostya erbynn an den a dregh ganso? A wra an heskenn braggya erbynn an den a heskenn gensi? Kepar ha pan wrello gwelenn shakya an den a wra y handla, po lath drehevel neppyth nag yw prenn!

¹⁶Rakhenna an Arloedh, ARLOEDH an luyow, a dhannvon kleves gwastyans yn mysk y gasoryon gorfek, hag yn-dann y wolewder loskvann a vydh enowys avel an losk a dan.

¹⁷Golow Ysrael a vydh avel tan, ha'y Sans avel flamm; hag ev a lesk ha devorya y spedhas ha'y spern yn unn jydh.

¹⁸Splannder y goes ha'y dir feyth ev a dhistru, enev ha korf war-barth, kepar dell wra den klav gwastya dhe-ves.

¹⁹Remenant gwydh y goes a vydh mar skant bys may hallo flogh aga nivera.

²⁰Y'n jydh na remenant Ysrael, ha'n re a skapyas dhiworth chi Yakob, ny besyons na fella kregi war an den a's gweskis, mes i a greg yn gwir war an ARLOEDH, Sans Ysrael.

²¹Remenant a dhehwel, remenant Yakob, dhe'n Duw galloesek.

²²Kyn fydh dha bobel Ysrael avel tewes an mor, unnsel remenant anedhi a dhehwel. Kollva yw erghys, ow fenna gans ewnder.

²³Rag an Arloedh, DUW an luyow, a wra distruyans leun, dell veu ordenys, yn kres oll an tir.

²⁴Rakhenna yndellma y lever an Arloedh, DUW an luyow: Ow fobel, trigys yn Sion, na borth own a Assyria neb a'th wysk gans gwelenn, ha drehevel y lorgh er dha bynn, dell wrug Ejyp.

²⁵Yn pols pur vyghan sorrvann er agas pynn a worfenn, ha'm sorr a dreyl dh'aga distruyans i.

²⁶ARLOEDH an luyow a wra dhe skorja difuna er aga fynn, kepar dell weskis Midyan orth karrek Oreb, ha'y lorgh a vydh war an mor, kepar hag yn Ejyp.

²⁷Y'n jydh na y vegh a vydh drehevys a-dhiwar dha skoedh, ha'y yew a-dhiwar dha gonna. Ev res eth yn-bann dhiworth Rimmon,[13]

²⁸ev re dheuth dhe Ayath; ev re dremenas dre Migron; yn Mikmash ev a settyas y fardellow yn-nans.

²⁹Ev re dremenas an bolgh, yn Geba ev a wodrigas dres nos; Rama a gren, Gibea a Sowl re fias.

³⁰Kri yn ughel, myrgh Gallim! Goslow, Laysha! Gorthyp dhedhi, Anathoth!

³¹Madmena a fi, annedhysi Gebim a hwila skovva.

³²Poran an jydh ma ev a worta yn Nob ha shakya y dhorn erbynn menydh myrgh Sion, erbynn brenn Yerusalem.

³³Otta, an Arloedh, ARLOEDH an luyow, a skether an skorrennow dre nerth euthyk; an gwydh meur aga ughelder a vydh treghys yn-nans, ha'n re hir a vydh uvelhes.

³⁴Ev a hakk prysk an koes dhe'n dor gans horn; Lebanon gans y gwydh krev a goedh.