Read Kernewek Ysay 11 Bible Online

Ysay 11 - Kernewek bible

Ysay 11

¹Egin a dheu yn-mes dhiworth kyf Yesse, ha skorrenn a dyv dhiworth y wreydh.

²Spyrys an ARLOEDH a bowes warnodho, spyrys furneth ha konvedhes, spyrys kusul ha nerth, spyrys skians hag own a'n ARLOEDH.

³Y dhelit a vydh yn own a'n ARLOEDH. Ny vreus herwydh golok y dhewlagas, nag ervira herwydh klewans y dhiwskovarn;

⁴mes ev a vreus an edhommogyon gans ewnder, hag ervira gans ewnder rag boghosogyon an norvys. Ev a wysk an norvys gans gwelenn y anow, ha gans spyrys y dhiwweus ev a ladh an tebelwas.

⁵Ewnder a vydh grogys y dhiwglun, ha lenduri grogys y gres.

⁶An bleydh a drig gans an oen, ha'n lewpard a wrowedh gans an mynn, an leugh ha'n lew yowynk ha'n lodhen peskys war-barth; ha mab byghan a's led.

⁷An vugh ha'n ors a beur, aga re yowynk a wrowedh war-barth; ha'n lew a dheber kala' avel an ojyon.

⁸Gwari a wra an flogh ow tena war doll an nader, ha'n flogh didhenys a worr y leuv war neyth an sarf.

⁹Ny wrons dregynn na ny dhistruons yn oll ow menydh sans; rag an norvys a vydh leun a wodhvos an ARLOEDH dell wra an dowrow kudha an mor.

¹⁰Y'n jydh na gwreydhenn Yesse a sev avel baner dhe'n poblow; an kenedhlow a'n hwila, ha'y bowesva a vydh gloryus.

¹¹Y'n jydh na an Arloedh a ystynn y leuv an nessa gweyth dhe dhaskavoes remenant y bobel yw gesys, dhiworth Assyria, dhiworth Ejyp, dhiworth Pathros, dhiworth Ethiopia, dhiworth Elam, dhiworth Shinar, dhiworth Hamath, ha dhiworth ynysow an mor.

¹²Ev a dhrehav baner rag an kenedhlow ha kuntell divresow Ysrael, ha dri war-barth an re skattrys a Yuda dhiworth peswar korn an norvys.

¹³Avi Efraym a dhiberth, hag eskerens Yuda a vydh treghys dhe-ves; Efraym ny berth envi a Yuda, ha Yuda ny arvedh Efraym.

¹⁴I a nij yn-nans war skoedh an Filistysi yn howlsedhes; war-barth i a byll mebyon an howldrevel. I a ystynn aga leuv erbynn Edom ha Moab, ha an Ammonysi a vydh aga sojets.

¹⁵An ARLOEDH a rann taves mor Ejyp; ev a wev y leuv war an avon gans nerth y wyns, ha'y gweskel yn seyth stredh rag may treusser yn sandalyow;

¹⁶y fydh fordh-veur dhiworth Assyria rag remenant y bobel yw gesys, kepar dell veu rag Ysrael y'n jydh mayth yskynnas yn-mes a bow Ejyp.