Read Kernewek Ysay 13 Bible Online

Ysay 13 - Kernewek bible

Ysay 13

¹Profoesans a-dro dhe Babylon, a wrug Ysay mab Amos y weles.

²War venydh moel drehevewgh baner, kriewgh yn ughel dhedha; gwevyewgh leuv rag may teffons yn yetys an ugheloryon.

³My re worhemmynnis dhe'm re sanshes, ynwedh my re elwis ow breselysi dhe gowlwul ow sorr, an re a vost y'm meuredh.

⁴Son routh y'n menydhyow, haval dhe bobel vras; son tervans gwlaskordhow, kenedhlow kuntellys war-barth: yma ARLOEDH an luyow ow kuntell lu rag bresel.

⁵I a dheu a dir pell, dhiworth pennow nev, an ARLOEDH hag arvow y sorrvann, dhe dhistrui an norvys oll.

⁶Oulyewgh, rag ogas yw dydh an ARLOEDH; kepar ha terroes dhiworth an Ollgalloesek.[14]

⁷Rakhenna pub leuv a vydh gwann, ha'n golonn a bub den a deudh.

⁸I a vydh dyegrys, gloesow ha keudh a's kemmer, i a vydh yn angoes kepar ha benyn ow tineythi. I a vir gans marth an eyl orth y gila, aga fasow a vydh avel flammow.

⁹Otta, dydh an ARLOEDH a dheu, fell, gans konnar ha sorr fers, dhe wul an tir ynyal ha distrui peghadoryon dhiworto.

¹⁰Rag ster an nevow ha'ga Orionow[15] ny rons aga golow. An howl a vydh tewl pan dhrehav, ha'n loer ny wra dh'y loergann splanna.

¹¹My a gessydh an norvys rag y dhroktra, ha'n debeles rag aga sherewynsi. My a wra dhe woeth an re orgelus sessya, hag uvelhe balghder turans.

¹²My a wra gour moy drudh ages owr pur, ha den ages owr a Ofir.

¹³Rakhenna my a wra dhe'n nevow krena, ha'n norvys a vydh shakys dhiworth y le, yn konnar ARLOEDH an luyow, yn dydh y sorr fers.

¹⁴Kepar hag ewik ownekhes, ha kepar ha deves heb denvyth dh'aga huntell, peub a dhehwel dh'y bobel, peub a fi dh'y dir y honan.

¹⁵Piwpynag a vo kevys a vydh gwanyes, ha piwpynag a vo kechys a goedh der an kledha.

¹⁶Aga fleghes a vydh hakkys dhe demmyn a-rag aga dewlagas; aga chiow a vydh ravnys ha'ga gwragedh defolys.

¹⁷Otta, my a dhifun an Medys er aga fynn, na wrons vri a arghans, ha ny hwansons owr.

¹⁸Aga gwaregow a vrew gwer yowynk; ny gemmerons truedh a frut an brys; ny vir aga lagas gans piteth war fleghes.

¹⁹Babylon, splannder gwlaskordhow, glori a woeth an Kaldeanys, a vydh avel Sodom ha Gomorra pan wrug Duw aga domhwel.

²⁰Ny vydh annedhys nevra, ha ny drig denvyth ynni a henedh dhe henedh; ny sett Arabyon aga thyldow[16] ena, ha ny wra bugeledh greow dhe bowes ena.

²¹Mes bestes gwyls a wrowedh ena, hag oulys a lenow hy chiow; strusyow a drig ena, ha boghes a derlemm[17] ena.

²²Keun a oul yn hy thouryow, hag owrgeun y'n palesyow fethus. Yma hy thermyn ow tos nes, ha ny vydh hy dydhyow delatys.