Read Kernewek Ysay 16 Bible Online

Ysay 16 - Kernewek bible

Ysay 16

¹Dannvenewgh eyn dhe rewler an tir dhiworth Sela dhe'n gwylvos, bys yn menydh myrgh Sion.

²Avel edhen ow trenija, tewlys dhiworth an neyth yth yw myrghes Moab orth rysyow Arnon.

³‘Dro kusul; gwrewgh ervirans. Gorr dha skeus kepar ha'n nos yn hanter-dydh; Kudh an re skattrys, na drayt an fowesik;

⁴Trigens genes an re skattrys dhiworth Moab; bydh skovva dhedha rag an distruer.’ Ny vydh an arwasker na fella, hedhi a wra an terroes, ha'n ravner a vydh gyllys dhiworth an tir.

⁵Ena tron a vydh fastys yn tregeredh, ha warnedhi yth esedh yn gwirder yn tylda Davydh, nebonan a vreus hag a hwila gwirvreus, hag a fisten dhe wul ewnder.

⁶Ni re glewas a woeth Moab — pur woethus yw — a-dro dh'y valghder ha'y woeth ha'y donteth, mes y vostow yw fals.

⁷Ytho Moab a oul, i oll a oul rag Moab. Kynewgh rag tesennow-grappys[20] Kir-hareseth, hwi hag yw kowldhistruys.

⁸Rag parkow Heshbon a wedher, ha gwinbrenn Sibma ynwedh. Arlydhi an kenedhlow re weskis hy gwella gwinbrennyer, a dhrehedhas bys yn Yazer ha gwandra troha'n difeythtir; hy skorrennow a lesas, ha tremena dres an mor.

⁹Rakhenna my a oel gans oelva Yazer rag gwinbrenn Sibma. My a'th towrha gans ow dagrow, A Heshbon hag Eleale; rag an arm war dha frutys hav ha'th trevas re hedhis.

¹⁰Lowena ha heudhder yw kemmerys dhiworth an tir feyth, hag y'n gwinlannow denvyth ny gan, na garma yn lowen; denvyth ny drett gwin y'n gwinwaskow. My re wrug an arm dhe hedhi.

¹¹Rakhenna ow holodhyon a hanas avel sowtri rag Moab, ha'm kolonn rag Kir-heres.

¹²Pan omdhiskwedh Moab, hag omskwitha war an tyller ughel, pan dheu dh'y sentri dhe bysi, ny amont mann.

¹³Hemm yw an ger re gewsis an ARLOEDH kyns a-dro dhe Moab.

¹⁴Mes lemmyn an ARLOEDH a lever, Yn teyr blydhen kepar ha blydhynyow arvethesik, splannder Moab a vydh dispresys, spit dhe oll an routh vras, ha'n remenant a vydh pur vyghan ha gwann.