Read Kernewek Ysay 17 Bible Online

Ysay 17 - Kernewek bible

Ysay 17

¹Profoesans a-dro dhe Damaskus. Otta, ny vydh Damaskus sita na fella, mes y fydh kals a vagoryow.

²Sitys Aroer a vydh forsakys, hag i a vydh rag flokkys a wrowedh ha denvyth ny wra dhedha perthi own.

³An kastell a vydh gyllys dhiworth Efraym, ha'n vyghterneth dhiworth Damaskus; remenant Aram a vydh avel glori mebyon Ysrael, yn-medh ARLOEDH an luyow.

⁴Y'n jydh na glori Yakob a vydh tanowhes, ha blonek y gig a vydh lehes.

⁵Ev a vydh avel myser a guntell ys, ha'y vregh a vys pennow-ys. Ev a vydh avel den a guntell gesigow pennow-ys yn nans Refaim.

⁶Mes gesigow a worta ynno, kepar ha pan vo olewbrenn gweskys, diw po teyr olivenn adhves orth penn an barrenn, peswar po pymp yn y skorr feyth, yn-medh an ARLOEDH, Duw Ysrael.

⁷Y'n jydh na den a vir orth y Wrier, ha'y dhewlagas a dreyl dhe Sans Ysrael.

⁸Ny vir orth an alteryow, ober y dhiwla, ha ny vir orth an Asherim ha'n alteryow ynkys a wrug y vysies.

⁹Y'n jydh na aga sitys krev, a vydh forsakys avel sitys an Hivysi ha'n Amorysi[21] a asons drefenn mebyon Ysrael; hag i a vydh difeyth.

¹⁰Rag ty re ankovas Duw dha selwyans, ha ny perthsys kov a garrek dha nerth. Rakhenna kynth esos ow plansa plansvaow hweg ha graffya skyll astranj;

¹¹kyn hwredh dhedha tevi y'n jydh ma's plensydh, ha gul dhedha bleujyowa y'n myttin ma's graffydh, hwath an drevas a fi dhe-ves yn dydh a galar ha payn heb remedi.

¹²Ogh tru, an tervans a lies pobel, ow terva kepar ha tervans an moryow; ha tarennans poblow kepar ha tarennans dowrow krev!

¹³Kenedhlow a darenn avel tarennans dowrow pals, mes ev a's keredh hag y fions pell, helghys avel us war an menydhyow a-rag an gwyns, hag avel has askall a-rag an awel.

¹⁴Gorthugherweyth, awotta euth tromm! Kyns myttin gyllys yns. Hemm yw tenkys an re a'gan raven, ha kevrenn an re a'gan pyll.