Read Kernewek Ysay 21 Bible Online

Ysay 21 - Kernewek bible

Ysay 21

¹Profoesans a-dro dhe wylvos an mor. Kepar dell dremen hwaffys awelyow y'n Negeb, ev a dheu dhiworth an gwylvos, dhiworth tir euthyk.

²Gwelesigeth asper yw disklerys dhymm; an traytour a drayt, an gwastyer a wast. Yskynn, Elam, gwra esedhva, Media; my a wrug dhe oll hy hanasow hedhi.

³Rakhenna ow diwglun yw leun a grena, gloesow a'm kemmeras kepar ha gloesow dineythi; troblys ov ma na allav klewes, ha dyegrys ov ma na allav gweles.

⁴Ow holonn a's teves penn-dro, degrena re'm dalghennas; an tewlwolow a hwansen re dheuth ha bos skruth dhymm.

⁵I a bareus moesow, i a les an strelyow; i a dheber, i a yv. Sevewgh, hwi pennsevigyon, olewewgh an skoes!

⁶Rag yndellma y lever an Arloedh dhymm: ‘Ke, sett goelyador, re dheriffo an pyth a wel.

⁷Pan wel ev charett ha para a varghogyon, koloven a asenes, koloven a gowrvargh, goslowes ev gans rach, gans meur a rach.’

⁸Ena an goelyador a elwis:[23] ‘War dour-goelyas sevel a wrav, a arloedh, dydhweyth prest; ha my a worta y'm goelyas der oll an nosow.

⁹Mir, otta gour ow tos yn charett, gans para a vergh.’ Ena ev a worthybis, ‘Babylon re goedhas, re goedhas; hag oll imajys hy duwow yw brewys war an leur.’

¹⁰Ow fobel, drushys ha noethys, an pyth a glewis dhiworth ARLOEDH an luyow, Duw Ysrael, my re dherivas orthowgh.

¹¹Profoesans a-dro dhe Duma. Nebonan a elow dhymm dhiworth Seir, ‘Goelyador, pandr'yw gesys a'n nos? Goelyador, pandr'yw gesys a'n nos?’

¹²An goelyador a lever, ‘Yma myttin ow tos, ha nos ynwedh. Mar kovynnowgh, govynnewgh; Dehwelewgh, dewgh.’

¹³Profoesans a-dro dhe Arabia. Yn kranndir Arabia yth ostyowgh, a garavanow an Dedanysi.

¹⁴Drewgh dowr dhe'n den sygh, dyerbynnewgh an fowesik gans bara, hwi annedhysi pow Tema.

¹⁵Rag i re fias dhiworth an kledhedhyow, dhiworth an kledha noeth, ha dhiworth an warak plegys, dhiworth garowder an vatel.

¹⁶Rag yndellma y leveris an Arloedh dhymm: A-ji dhe unn vlydhen, war-lergh blydhynyow arvethesik, oll glori Kedar a worfenn.

¹⁷Remenant an waregoryon, kasoryon mebyon Kedar, a vydh boghes; rag an ARLOEDH, Duw Ysrael, re gewsis.