Read Kernewek Ysay 22 Bible Online

Ysay 22 - Kernewek bible

Ysay 22

¹An profoesans a-dro dhe nans an welesigeth. Pandr'yw dhis, ty dhe yskynna dhe'n tohow, pub huni,

²ty neb yw leun a drosow, sita a dervans, tre lowen? Dha re ledhys ny vons ledhys gans an kledha, na ny vons ledhys yn batel.

³Oll dha ledyoryon a fias war-barth; prisonys vons heb plegya gwarak. Prisonys war-barth a veu oll dha gasoryon alloesek,[24] kyn fisons a-bell.

⁴Rakhenna my a leveris, Mirewgh dhe-ves dhiworthiv, my a oel yn hwerow. Na assayewgh ow honfortya drefenn terroes myrgh ow fobel.

⁵Ytho an Arloedh, DUW an luyow, a'n jeves dydh a dervans ha trettya ha deray yn nans an welesigeth, dydh a derri fosow ha kriow dhe'n menydh.

⁶Elam a dhug an woen gans charettow ha marghogyon; Kir a dhiskudhas an skoes.

⁷An gwella a'th nansow yw leun a charettow, ha marghogyon yw settys orth an yetys.

⁸Ev a gemmeras dhe-ves kudhans Yuda. Y'n jydh na ty a viras orth arvow Chi an Goeswik.[25]

⁹Hwi a welas aswaow sita Davydh, i dhe vos lies; ha hwi a guntellas dowr an poll isella.

¹⁰Hwi a niveras chiow Yerusalem, ha terri an chiow dhe gera an fos.

¹¹Hwi a wrug kreun ynter an dhiw fos rag dowr an poll koth, mes ny virsowgh orth y Wrier na gweles neb a'n furvyas nans yw pell.

¹²An Arloedh, DUW an luyow, a elwis y'n jydh na rag oelva ha rag kynvann, rag bloghter ha rag omwrogysa gans yskar.

¹³Hag otta yma joy ha lowender, ladha chatel ha ladha deves, dybri kig hag eva gwin; ‘Dybryn hag evyn, rag a-vorow ni a verow’.

¹⁴ARLOEDH an luyow re dhiskudhas hemma y'm diwskovarn: Yn tevri ny vydh prenedh dhywgh rag an anewnder ma erna verwowgh, yn-medh an Arloedh, DUW an luyow.

¹⁵Yndellma y lever an Arloedh, DUW an luyow: Ke, deus dhe'n menystrer ma, Shebna, governour an palys, ha lavar:

¹⁶Pandra eus dhis omma, ha piw eus dhis omma, ty dhe dreghi bedh yn-mes ragos dha honan omma, ow treghi bedh yn tyller ughel, hag ow kervya trigva y'n garrek?

¹⁷Otta, an ARLOEDH a wra dha dheghesi dhe-ves yn harow, ty wour; ev a sett dalghenn ynnos devri.

¹⁸Ev a wra dha vaylya yn stroeth avel pellenn ha dha dewlel yn tir efan. Ena ty a verow, hag ena y fydh dha jarettow splann, ty veth dhe ji dha vester!

¹⁹My a wra dha herdhya dhiworth dha dyller, ha'th terri dhiworth dha savla.

²⁰Y'n jydh na my a elow ow gwas, Elyakim mab Hilkia.

²¹My a wra y gwetha gans dha bows ha kelmi dha wrogys warnodho. My a re dha awtorita yn y leuv, hag ev a vydh tas dhe annedhysi Yerusalem ha dhe ji Yuda.

²²My a worr alhwedh chi Davydh war y skoedh; ev a iger ha nagonan ny dhege; ev a dhege ha nagonan ny iger.

²³My a wra y gentra avel ebil yn tyller sur, hag ev a vydh tron a glori rag chi y das.

²⁴I a greg warnodho oll glori chi y das, an agh ha'n askorr, oll an lestri byghan, dhiworth an bollow bys an pottow.

²⁵Y'n jydh na, yn-medh ARLOEDH an luyow, y fydh removyes an ebil a veu kentrys yn tyller sur; treghys vydh, hag ev a goedh, ha'n begh esa warnodho a vydh treghys mes, rag an ARLOEDH re gewsis.