Read Kernewek Ysay 25 Bible Online

Ysay 25 - Kernewek bible

Ysay 25

¹A ARLOEDH, ty yw ow Duw; my a'th ughelha, my a wormel dha hanow, rag ty re wrug marthusyon, towlow a'n termyn koth, len ha sur.

²Ty re wrug an sita yn graghell, an kastell gans keryow yn magor. Nyns yw palys an estrenyon sita namoy; nevra ny vydh dastrehevys.

³Rakhenna pobel grev a wra dha lorifia, ha sitys kenedhlow garow a berth own ahanas.

⁴Ty re beu dinas dhe'n den gwann, dinas dhe'n den truan yn y ahwer, skovva rag an gowas ha goskes rag toemmder. Rag anall turans yw kepar ha kowas a-has erbynn fos.[27]

⁵Kepar ha syghor yn tir sygh, ty a demper tros estrenyon;[28] kepar ha toemmder yn goskes kommol, ev a goselha kan turans.

⁶War an menydh ma ARLOEDH an luyow a wra rag oll an poblow kevewi a voes rych gans oyl, kevewi a win koth, boes rych sawrys gans mer, gwin koth sidhlys.

⁷War an menydh ma ev a gollenk an lien-bedh usi dres oll an poblow, an lien lesys war oll an kenedhlow.

⁸Ev a gollenk ankow bys vykken. An Arloedh DUW a sygh an dagrow dhiworth pub fas; ha kemmeres mewl y bobel dhe-ves a-dhiwar oll an norvys, rag an ARLOEDH re gewsis.

⁹Y'n jydh na y fydh leverys, Otta, hemm yw agan Duw; ni a'n gortas, hag ev a'gan sawyas. Hemm yw an ARLOEDH ha ni re'n gortas; bedhen ni lowen ha fest heudhik yn y selwyans.

¹⁰Rag leuv an ARLOEDH a bowes war an menydh ma. Moab a vydh trettys yn-dann dreys yn dyller dell yw kala trettys yn teylek.

¹¹Ev a les y dhiwla ynni avel neuvyer pan neuv. Y woeth a sedh, yn despit dhe wayans y dhiwleuv.

¹²Keryow ughel dha fosow a vydh dres yn-nans, iselhes, tewlys dhe'n dor, bys y'n doust.