Read Kernewek Ysay 26 Bible Online

Ysay 26 - Kernewek bible

Ysay 26

¹Y'n jydh na an gan ma a vydh kenys yn pow Yuda: Ni a'gan beus sita krev; ev a wra selwyans, avel fosow ha kerweyth.

²Igerewgh an yetys rag mayth entro dredha an genedhel wiryon, a with lelder.

³Ty a with yn kres perfydh an den yw fyrv y vrys, rag ev a drest ynnos.

⁴Trestyewgh y'n ARLOEDH bynnari rag an ARLOEDH DUW[29] yw karrek bys vykken.

⁵Ev a uvelha an re usi trigys y'n ughelder, an sita ughel; ev a's iselha bys y'n dor ha'y thewlel bys y'n doust.

⁶An troes a's trett, treys an den truan, pasys an voghosogyon.

⁷Fordh an den gwiryon yw kompes; ty a wra leven hyns an den gwiryon.

⁸Yn hyns dha vreusow, ni a'th worta A ARLOEDH; dha hanow ha dha govadh yw hwans an enev.

⁹Ow enev a yeun war dha lergh y'n nos; ow spyrys ynnov a'th hwila. Rag pan vydh dha vreusow y'n wlas, annedhysi an bys a dhysk ewnder.

¹⁰Mars yw favour diskwedhys dhe debelwas, ny dhysk ewnder; yn tir a ewnder ev a wra anewnder, heb gweles meuredh an ARLOEDH.

¹¹A ARLOEDH, drehevys yw dha leuv, mes ny's gwelons. Gwelens i dha avi rag dha bobel ha perthi meth; gas dhe'n tan gwithys rag dha eskerens aga devorya.

¹²A ARLOEDH, ty a orden kres ragon, rag pup-tra a wrussyn, ty a'n gwrug ragon.

¹³A ARLOEDH agan Duw, arlydhi erell re'gan rewlyas a-der ty, mes dha hanow unnsel ni a venek.

¹⁴Ny vew an re varow; ny sev spyrysyon an re varow. Rag ty re's kessydhyas ha'ga distrui; ty re wrug oll kov anedha dhe vos kellys.

¹⁵Ty re gressyas kenedhel, A ARLOEDH, ty re gressyas an genedhel; glorifiys os; Ty re voghhas oll oryon an tir.

¹⁶AARLOEDH, yn ahwer i a'th hwilas; i a dhiveris pysadow pan veu dha hessydhyans warnedha.

¹⁷Kepar dell wra benyn gans flogh, ogas dhe dhineythi, gwynnel ha kria yn hy gloesow, yn kettella yth esen ni a-ragos, A ARLOEDH.

¹⁸Ni a gonsevyas, ni a wynnis yn poen, mes ny dhineythsyn marnas gwyns. Ny waynsyn budhogolethow y'n tir, na fetha annedhysi an nor.[30]

¹⁹Dha re varow a vydh bew; aga horfow a sev. Difunewgh ha kenewgh yn lowen, annedhysi an doust; rag dha luth yw gluth a wolow, ha'n nor a dhineyth spyrysyon an re varow.

²⁰Ke ow fobel, enter dhe'th chambour ha dege dha dharas a-dryv dhis; omgudh prysweyth bys pan dremen sorrvann.

²¹Rag awotta an ARLOEDH ow tos yn-mes a'y le dhe gessydhya annedhysi an norvys rag aga anewnder. An dor a dhiskudh an krow skoellys warnodho; ha ny gudh y re ledhys byth moy.