Read Kernewek Ysay 27 Bible Online

Ysay 27 - Kernewek bible

Ysay 27

¹Y'n jydh na an ARLOEDH a gessydh gans y gledha kales, bras ha krev Lawethan an sarf usi ow fia, Lawethan an sarf usi ow gwrynya; ha ladha an dhragon usi y'n mor.

²Y'n jydh na: Gwinlann desiradow, kenewgh a-dro dhedhi.

³My, an ARLOEDH, a's gwith; prest my a wra hy dowrhe. My a's gwith mo ha myttin rag na's pystikko nagonan.

⁴Nyns ov vy serrys. A pe spedhas ha spern, y keskerdhsen er aga fynn yn batel ha'ga leski oll yn tien.

⁵Poken treylyens dhymm rag skovva; gwrens i kres genev vy, ya, gwrens i kres genev vy.

⁶Y'n termyn a dheu, gwreydhya a wra Yakob, Ysrael a egin ha bleujyowa ha lenwel enep an nor a frut.

⁷A wrug ev aga gweskel dell weskis an re a's gweskis? Po a vons ledhys kepar dell veu ledhys an re a's ladhas?

⁸Orth aga fellhe, orth aga divroa ty a strivyas gansa; gans y hwyth fers ev a's removas yn dydh gwyns an Est.

⁹Rakhenna, yndellma anewnder Yakob a vydh prenys, ha hemma a vydh an frut leun ow treylya dhe-ves y begh: pan worr oll meyn an alter avel meyn krey dralyes, ny sev Asherim nag alteryow ynkys.

¹⁰Rag an sita gerys a vydh hy honan oll, trigva ynyal ha forsakys; ena an leughi a beur, hag ena i a wrowedh ha devorya pub barrenn.

¹¹Pan yw sygh hy skorrow, yth yns terrys dhe-ves; benynes a dheu ha'ga enowi. Rag homm yw pobel heb konvedhes; rakhenna ny gemmer aga Kreador truedh anedha, ha ny dhiskwedh aga Gwrier favour dhedha.

¹²Y'n jydh na an ARLOEDH a dhrush a-dhiworth kanel an Ewfrates bys yn nans Ejyp, ha hwi, mebyon Ysrael, a vydh kuntellys onan hag onan.

¹³Hag y'n jydh na, an hirgorn bras a vydh hwythys, ha'n re a veu kellys yn pow Assyria, ha'n re a veu divres yn pow Ejyp a dheu ha gordhya an ARLOEDH y'n menydh sans, yn Yerusalem.