Read Kernewek Ysay 28 Bible Online

Ysay 28 - Kernewek bible

Ysay 28

¹Go-hi gurun woethus pennow-medhow Efraym, ha bleujenn gwedhrys y dekter splann, usi war benn nans fethus an re medhwys gans gwin!

²Otta, yma dhe'n Arloedh onan yw krev ha galloesek, kepar ha tewedh keser, annawel terroesus, kepar ha tewedh dowrow meur ow fenna. Gans y leuv ev a's deghes yn-nans dhe'n nor.

³Trettys yn-dann dreys a vydh kurun woethus pennow-medhow Efraym.

⁴Bleujenn wedhrys an tekter splann usi war benn an nans fethus a vydh kepar ha'n kynsa figysenn kyns an hav; piwpynag a's gwel ev a's lenk, kettell y's teffo yn y balv.

⁵Y'n jydh na ARLOEDH an luyow a vydh kurun a glori, garlont a dekter rag remenant y bobel,

⁶ha spyrys a wirvreus dhe neb a esedh yn breus, ha nerth dhe'n re a dreyl an vatel dhe-ves dhiworth an yet.

⁷An re ma ynwedh a drebuch dre win, ha sowdhanas dre gorev; oferyas ha profoes a drebuch dre gorev, ha sowdhanas dre win, i a sowdhan dre gorev; i a drebuch yn gwelesigeth, ha gwandra yn ervirans.

⁸Rag oll moesow yw leun a hwyj ha kawgh; nyns eus tyller vyth glan.

⁹‘Dhe biw y tysk ev skians? ha dhe biw y styr ev an messaj? An re didhenys dhiworth leth, an re diberthys dhiworth an dhiwvronn?

¹⁰Rewl war rewl, rewl war rewl, linenn war linenn, linenn war linenn, banna omma, banna ena.’

¹¹Yn hwir, gans gweusyow estren ha gans taves alyon ev a gews orth an bobel ma,

¹²dhedha may leveris ‘Homm yw an bowesva, gwrewgh an den skwith dhe bowes, ha hemm yw tyller diskwitha’, mes ny vynnens klewes.

¹³Ger an ARLOEDH a vydh dhedha, ‘Rewl war rewl, rewl war rewl, linenn war linenn, linenn war linenn, banna omma, banna ena’, rag mayth ellons ha koedha war-dhelergh ha bos terrys, ha maglennys, ha kemmerys.

¹⁴Rakhenna klewewgh ger an ARLOEDH, hwi vostoryon, a rewl an bobel ma yn Yerusalem.

¹⁵Rag hwi dhe leverel, ‘Ni re wrug kevambos gans ankow, ha gans ifarn ni re wrug akord; pan dremen an skorja avel liv ow fenna, ny dheu dhyn ni; rag ni re wrug gow agan skovva, ha ni re omgudhas yn falsuri’ —

¹⁶rakhenna yndellma y lever an Arloedh DUW, Otta, yth esov ow gorra selven yn Sion, men prevys, pennmen drudh, selven sur; piwpynag a grys ny vydh fysk.

¹⁷My a wra dhe wirvreus bos kordenn-vusura, ha dhe ewnder bos plemmik; keser a skub dhe-ves an skovva a wowyow, ha dowrow a liv dres an gudhva.

¹⁸Agas kevambos gans ankow a vydh removyes, ha'gas gwelesigeth gans ifarn ny sev. Pan dremen an skorja dresowgh avel liv ow fenna, hwi a vydh trettys dhe'n dor ganso.

¹⁹Peskweyth may tremen ev a'gas kemmer; myttin ha myttin y tremen, y'n jydh hag y'n nos. Konvedhes an derivas a vydh pur euth.

²⁰Rag an gweli yw re gott rag den dhe omystynna warnodho, ha'n ballenn yw re ynn rag den dhe omvaylya.

²¹Rag an ARLOEDH a sev dell wrug orth menydh Perasim, ev a gonner dell wrug yn nans Gibeon, dhe wul y weythres, y weythres ankoth, ha dhe oberi y ober, y ober estren.

²²Lemmyn ytho na wrewgh ges, ma na vo agas kadonyow krevhes; rag my a glewas kollva dhe vos ervirys dhiworth an Arloedh, DUW an luyow, war oll an tir.

²³Goslowewgh ha klewewgh ow lev, attendyewgh ha klewewgh ow lavar.

²⁴A wra an aradror aras der an jydh oll rag hasa? A wra ev igeri ha kloesya y dir der an jydh oll?

²⁵Wosa levenhe y enep, a ny skatter fenogel ha hasa kumin, ha gorra gwaneth yn rewyow, heydh yn y dyller ewn, ha gwaneth-spelt yn y or?

²⁶Y Dhuw a wra y gevarwoedha, ha'y dhyski yn ewn.

²⁷Rag nyns yw fenogel drushys gans draylell-dhrushya, ha nyns yw ros kert rolys war gumin; mes fenogel yw dornys gans lath ha kumin gans gwelenn.

²⁸Greun yw melys rag bara, mes ny wra an drushyer drushya bys vykken; ros y gert a rol warnodho, mes ny wra y vergh y vala.

²⁹Hemma ynwedh a dheu dhiworth ARLOEDH an luyow, neb yw marthys yn kusul, ha meur y dhoethter.